संविधान कोमामा छ, संसद पुनर्स्थापना गरेर जोगाउनु पर्छ : पूर्वगृहमन्त्री शर्मा

चितवन । पूर्वगृहमन्त्री जनार्दन शर्माले संसद विघटनपछि संविधान कोमामा पुगेको भन्दै यसलाई बचाउन संसद पुनर्स्थापना गर्नु पर्ने बताएका छन् ।

भरतपुरमा मंगलबार आयोजित संयुक्त एम्बुलेन्स चालक संघ नेपालको स्थापना दिवस तथा तेस्रो वार्षिक साधारणसभा उद्घाटन समारोहलाई सम्बोधन गर्दै उनले यस्तो बताएका हुन् ।

पूर्वमन्त्री शर्माले भने, ‘प्रधानमन्त्री ओलीले यो संविधानमा प्रहार गर्नुभयो, आक्रमण गर्नुभयो । त्यो आक्रमणबाट राजनीतिक दुर्घटना निम्तिएको छ । आज संविधान कोमामा छ । निजी स्वार्थका लागि संविधान कोमामा लगिएको छ । समग्र संविधान सिध्याउने र प्राप्त अधिकार पछाडि पार्ने काम भएको छ ।’ 

उनले संविधानको रक्षा गर्न संसद पुनर्स्थापनाको माग गरिएको बताए । सबै पार्टी एकभई प्राप्त अधिकार रक्षा गर्न आन्दोलनमा होमिनुको विकल्प नभएको उनको भनाइ थियो ।