स्पेनमा कोरोना महामारीको पुनः दोश्रो लहर, हाल सम्म १० लाख संक्रमित

एजेन्सी । पश्चिम युरोपेली देश स्पेनमा दोश्रो पटक कोरोना भाइरसको लहर शुरु भएको छ । स्पेनमा हालसम्म कोरोना संक्रमित हुनेको संख्या १० लाख नाघेको छ । सो क्षेत्रमा यति धेरै संख्यामा संक्रमित हुने स्पेन पहिलो देश हो ।

बुधबार स्पेनमा १६ हजार ९७३ जना नयाँ संक्रमित थपिए भने १५६ जनाको कोभिड–१९ का कारण ज्यान गयो । महामारीको पहिलो लहर लगभग अन्त्य हुंदै गएको अवस्थामा पुनः दोश्रो लहर देखा परेको हो । 

स्पेनमा गएको जनवरी ३१ मा पहिलो व्यक्तिमा संक्रमण पुष्टि भएको थियो । त्यसपछि अहिलेसम्म १० लाख पाँच हजार २९५ जनामा संक्रमण पुष्टि भएको छ । विश्वमा १० लाख भन्दा बढीमा संक्रमण पुष्टि हुने स्पेन छैटौँ देश हो । अमेरिका, भारत, ब्राजिल, रुस र अर्जेन्टिनामा यसअघि नै सो आँकडा पूरा भएको थियो ।