नेकपा सचिवालय बैठक आज

रिक्त तीन मन्त्री मात्रै थपेर मन्त्रिपरिषद् पुनर्गठनको सन्देश दिने प्रधानमन्त्री ओलीको तयारी

सफल खबर संवाददाता

मंगलबार, २० असोज २०७७, ०८ : ४५
रिक्त तीन मन्त्री मात्रै थपेर मन्त्रिपरिषद् पुनर्गठनको सन्देश दिने प्रधानमन्त्री ओलीको तयारी

काठमाडौं । सत्तारुढ दल नेकपाको सचिवालय बैठक आज बस्दैछ । दिउँसो ४ बजे प्रधानमन्त्री निवास बालुवाटारमा बस्ने बैठकमा मन्त्रिपरिषद् पुनर्गठन, सम्वैधानिक राजनीतिक नियुक्ति देखि पार्टी एकताका बाँकी काम टुंगो लगाउने विषयमा केन्द्रीत रहेर छलफल हुने नेताहरुले बताएका छन् । सचिवालय बैठक शनिबार बस्ने तय भएको थियो ।

तर आइतबार बस्ने गरी अन्तिम समयमा बैठक स्थगित गरिएको थियो । शनिबार नै प्रधानमन्त्री एवं अध्यक्ष केपी शर्मा ओलीको नीजि सचिवालयका मुख्य सल्लाहकार, प्रेस सल्लाहकार, परराष्ट्र सल्लाहकार, प्रमुख स्वकिय सचिव देखि दर्जनौं सुरक्षाकर्मीलाई पनि कोरोना संक्रमण देखिएपछि बैठक स्थगित भएको थियो ।

Yeti Diistillery Tansen Cement box

त्यस बैठकमा प्रधानमन्त्री ओलीले पार्टीभित्र छलफल नै नगरी एकतर्फी अमेरिका, बेलायत, दक्षिण अफ्रिका लगायतका मुलुकमा राजदुत नियुक्ति गर्ने देखि मुख्य सचिव नियुक्ति सम्मका निर्णयहरु मन्त्रिपरिषद्बाट गराएका थिए । तर यो विषयमा ओलीले पार्टी नेताहरु पार्टीसँग कुनै परामर्श गरेका थिएनन् । त्यसपछि सचिवालय सदस्यहरुको मागकै आधारमा बैठक तय भएको थियो ।

बैठकमा ओलीको चर्काे आलोचना फेरि हुने देखेपछि ओलीले अन्तिम समयमा शनिबारको बैठक नै स्थगित गराईदिएका थिए । आफुमाथीको आक्रोश नेताहरुको बढ्ने देखेर नै उनले जानाजान शनिबारको बैठक रोकिदिएका थिए । तर आइतबार र सोमबार पार्टीका कार्यकारी अध्यक्ष प्रचण्डसँग उनले बालुवाटारमा गरेको छलफल पछि आजको लागि सचिवालय बैठक बोलाईएको हो ।

 यो बीचमा दुई अध्यक्षले प्रदेश ५ को राजधानी दाङको भालुवाङ (देउखुरी क्षेत्र) बनाउने गरी मुख्य मन्त्री शंकर पोखरेललाई सहमति दिने काम गरेका छन् । यो निर्णयमा सचिवालयका ९ मध्ये ८ सदस्यको सहमति देखिएपनि महासचिव विष्णु पौडेल भने असहमत देखिन्छन् ।

उनले आइतबार दुवै अध्यक्ष, प्रदेश ५ का मुख्यमन्त्री र कर्णाली प्रदेशका पार्टी इन्चार्ज जर्नादन शर्मा रहेको बैठकमा भालुवाङ राजधानी लैजाने निर्णयप्रति असहमति जनाउँदै पूर्नविचारको माग गरेका थिए । उनी निर्वाचित क्षेत्र रुपन्देहीमा अहिले अस्थायी राजधानी थियो । आजको सचिवालय बैठकमा सोही असन्तुष्टिका कारण पौडेलको उपस्थिती रहने या उनले बैठक नै बहिष्कार गर्ने भन्ने सम्मको पनि चर्चा चलेको छ । उनी बैठकमा जाने या नजाने अथवा उनले बैठकमा यस विषयमा नोट अफ डिसेन्ट लेख्ने या नलेख्ने भन्ने विषयमा पनि आजको सचिवालय बैठकमा छलफल हुने बताईएको छ ।

त्यस्तै मन्त्रिमण्डल पुनर्गठनका सन्र्दभमा ओलीले रिक्त तीन मन्त्रालयमा मन्त्री नियुक्तिको विषय अहिले उठाउने तयारी गरेको स्रोत बताउँछ । त्यसो हुदाँ अर्थमन्त्रीमा विष्णु पौडेल, सूचना तथा सञ्चारमा जनार्दन शर्मा र सहरी विकासमा सुरेन्द्र पाण्डेलाई मन्त्री बनाउने गरी ओलीले प्रस्ताव अगाडी सार्ने सम्भावना देखिएको छ । तर यो मोडेलमा अन्य सचिवालयका सदस्यहरु सहमत हुने नहुने अहिले नै बताउन सकिने अवस्था देखिएको छैन् ।

माधव नेपाल प्रधानमन्त्री बाहेक पूरै सेट परिवर्तनको पक्षमा देखिएका छन् भने प्रचण्ड दुई वर्ष पूरा भएकालाई बिदाई गरेर ब्यापक मात्रामा पुनर्गठनको पक्षमा छन् । तर ओली रिक्त तिन मन्त्रालयमा नयाँ मन्त्री नियुक्त गर्ने र तीन मन्त्रालय टुक्राएर थप तीन मन्त्री नियुक्ति गर्ने तिर मात्र देखिईरहेका थिए । यस विषयमा नेकपाले आजको सचिवालय बैठकवाट केही न केही निर्णय लिन सक्ने बालुवाटार श्रोतले बताएको छ ।

सम्वैधानिक राजनीतिक नियुक्तिका सवालमा पनि निश्चित मापदण्ड भित्र प्रधानमन्त्री ओलीलाई स्वेच्छाचारि निर्णय लिन बाट कस्ने रणनीति सचिवालय सदस्यहरुले बनाउन सक्नेछन् । गत मन्त्रिपरिषद्को निर्णयमा चर्काे आलोचना गर्दै त्यस्तो रणनीति तय गर्न सक्ने सम्भावना पनि देखिएको छ । त्यसका अतिरिक्त १० दिनभित्र पार्टी एकताको काम टुंग्याउने गरी दुई अध्यक्ष र महासचिवलाई ठोस प्रस्ताव सचिवालय बैठकमा ल्याउन गरेको आग्रह अनुसार दुई अध्यक्ष र महासचिवले के कस्ता गृहकार्य गरे भन्नेमा पनि बैठकमा छलफल हुने देखिएको छ ।
 

प्रतिक्रिया दिनुहोस