कुलमान घिसिङलाई माग्दा पानीको फोहोरा

काठमाडौँ । विद्युत प्राधिकरणको कार्यकारी निर्देशकमा फेरि पनि कुलमान घिसिङको माग भइरहेको छ । प्राधिकरणमा पुनः कुलमान घिसिङलाई माग्दा नागरिकहरुले पानीको फोहोरा खानु परेको छ । 

घिसिङ चार वर्षे कार्यकाल सकेर बिदा भएका छन् । सामाजिक सञ्जालमा मात्र होइन, घिसिङको माग सडकबाट पनि उठ्न थालेको छ ।  घिसिङको माग गर्दै माइतीघर मण्डलमा प्रदर्शनमा उत्रिएकालाई प्रहरीले तितरवितर पारेको छ।

घिसिङलाई नै कार्यकारी निर्देशकमा पुनर्नियुक्ति गर्न माग गर्दै समर्थकहरूले बुधबार दिउँसो माइतीघर मण्डलमा प्रदर्शन गरेका थिए। प्रदर्शनमा उत्रिएकालाई तितरवितर पार्न प्रहरीले पानीका फोहोरा  प्रहार गरेको थियो।

नेपालमा लोडसेडिङ घिसिङकै नेतृत्वमा हटाइएको भन्दै उनलाई नै प्राधिकरणमा निरन्तरता दिन समर्थकहरूको माग गरिरहेका छन् । घिसिङलाई प्राधिकरणमा नल्याए पुनः लोडसेडिङ हुने भन्ने डर यतिबेला नागरिकहरुमा छ । जसका कारण घिसिङलाई प्राधिकरणमा ल्याउन सरकारलाई पनि जनदबाब भइरहेको छ ।