काठमाडौं । काठमाडौं उपत्यकामा बिहिबार मात्रै ७६ जना कोरोना संक्रमित ब्यक्ति भेटिए । बुधबार त्यो संख्या अझ बढेर १०२ जनामा देखिएको थियो । झण्डै एक दर्जन संक्रमित ब्यक्तिहरु आफनो सम्र्पक नम्बरहरु नै स्वीचअफ गरेर गुपचुप सम्र्पक बाहिर छन् । लकडाउन हटाइएको घोषणा साउन ७ मा उपत्यकाका तीन ओटै जिल्लामा जम्मा ३ जनामा संक्रमण देखिएको थियो । तर लकडाउन हटाएपछि बढेको भीडभाडका कारण त्यो संख्या बढेर थामीनसक्नु अवस्थामा पुग्न थालेको छ ।
जनघनत्व बढी रहने, भेटघाट बढी हुने जनसम्र्पकमा रहेका ब्यक्तिहरुमा कोरोना देखिएको छ । संसदका प्रवक्ता रोजनाथ पाण्डेलाई कोरोना संक्रमण देखिनु, नेकपा अध्यक्ष प्रचण्डको घरको सुरक्षामा बाहिरी घेरामा रहेका ६ जना सुरक्षाकर्मीमा पनि कोरोना देखिनु, अख्तियारमा खटिएका सुरक्षाकर्मी, प्रहरी मुख्यालयमा रहेका प्रहरीहरुसम्ममा पनि कोरोना देखिएको छ । यसले उपत्यकामा भित्रभित्रै कोरोना संक्रमणको अवस्था समुदायस्तरमै फैलिइसकेको हुन सक्ने आशंका हुन थालेको छ । अहिलेसम्म काठमाडौं उपत्यका भित्र ६ सय ७४ जना संक्रमित भइसकेका छन् ।
४ सय ७२ जना काठमाडौं, १ सय २४ जना ललितपुर र ७८ जना भक्तपुरका रहेका छन् । तर बढ्दो चाप र भीडभाडका बीचमा उपत्यकाभित्र कोरोना रोकथाम र नियन्त्रणका लागि सरकारले के गर्ने ? सरकार आफै अलमलमा परेको देखिएको छ । उपत्यकामा जोखिम न्यूनीकरण गर्ने र संक्रमण रोक्ने उपायको खोजीमा छलफल गर्न आज काठमाडौं, भक्तपुर र ललितपुर तीनओटै जिल्लाका प्रमुख जिल्ला अधिकारी, सुरक्षा निकाय र स्वास्थ्य क्षेत्रका अधिकारीहरुको संयुक्त बैठक बस्न लागेको छ । काठमाडौंका प्रमुख जिल्ला अकिारी जनकराज दाहालले जोखिम रोकथाम र नियन्त्रणका लागि आवश्यक तयारीका लागि छलफल गर्न लागिएको बताए ।
अहिले मानिसहरुले आवश्यक सुरक्षा सर्तकता नअपनाउने, सरकारले जारी गरेका निर्देशनहरुको पालना नगर्ने र जोरबिजोर प्रणाली, राती बाहिर नहिड्न गरेको निर्देशन र अत्यावश्यक बाहेक मानिसहरुलाई घर बाहिर नहिड्न गरेको आग्रहलाई अटेर गर्ने परिस्थिती बनिरहे फेरि लकडाउन गर्नुपर्ने अवस्था आउन सक्ने प्रमुख जिल्ला अधिकारी दाहाल बताउँछन् । यी सबै विषयमा आजको बैठकमा गम्भिर रुपमा समिक्षा गर्ने र थप रणनीति बनाइने उनले बताए । उपत्यका भित्रिने नाकाबाट सबैभन्दा धेरै जोखिम देखिएको र अब यसलाई कसरी व्यवस्थित गर्ने ? थप कहाँ कहाँ सिल गर्ने वा के गर्ने भन्ने विषयमा पनि आजको बैठकमा छलफल हुने बताईएको छ ।
भक्तपुरको नाका साँगा भञ्ज्याङ र काठमाडौंको नाका नागढुंगाबाट आउने व्यक्तिमा कोरोनाको संक्रमण बढी देखिएको छ । गृह मन्त्रालयले बुधवार सुचना जारी गर्दै २ सय भन्दा बढी एक्टिभ केस भएको जिल्लामा जोरबिजोर प्रणाली अनुसार निजी तथा सार्वजनिक सवारी संचालन गर्न निर्देशन दिइसकिएको छ । काठमाडौं उपत्यकाभित्र बिहिबारदेखि जोरबिजोर अनुसार सवारी संचालनमा छन् । सरकारले देशव्यापी रुपमा गरेको लकडाउन खुलेसँगै काठमाडौं उपत्यकामा पछिल्लो दुई हप्तामा पाँच सयभन्दा बढी कोरोना संक्रमित थपिएका छन् ।
लकडाउनको अवधिभर उपत्यकामा केवल ३ सय ८२ जना मानिसमा कोरोना संक्रमण पुष्टि भएको थियो । तर, लकडाउन खुलेपछि साउन ७ गते यता बिहीबारसम्ममा उपत्यकामा ५ सय १ जनामा कोरोनाको संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार उपत्यकाका तीनवटै जिल्लामा गरी अहिलेसम्म ८ सय ३४ जनामा कोरोना संक्रमण पुष्टि भएको छ । उपत्यकामा कोरोना संक्रमणका कारण ६ जनाको निधन भएको छ ।
प्रतिक्रिया दिनुहोस
सफल खबर संवाददाता
शुक्रबार, २३ साउन २०७७, १० : ३९
लेखकबाट थप
सम्बन्धित समाचारहरु
एक हप्तामा २८ जनामा कोरोना सङ्क्रमण
सुदूरपश्चिममा सात जनामा कोरोना पुष्टि
थप दुई जनामा कोरोनाको नयाँ भेरिएन्ट जेएन वान् सङ्क्रमण
नेपालमा भेटियो कोरोनाको नयाँ भेरियन्ट
विश्वभर बढे कोरोना संक्रमित, सतर्कता अपनाउन आग्रह
चीनमा पुनः कोरोना : अक्टोबरमा २४ जनाको मृत्यु