ओलीको सन्देश लिएर नेम्वाङ पुगे देउवाकहाँ

काठमाडौँ । सत्तारुढ दल नेपाल कम्युनिष्ट पार्टी (नेकपा) भित्र विवाद बढ्दै जाँदा राजनीतिक परिदृश्य अनौठो देखिन थालेको छ ।

आफूनिकट नेकपाका नेताहरूसँग प्रधानमन्त्री निवास बालुवाटारमा छलफल गरेपछि ओलीले पूर्वसभामुख सुवास नेम्वाङलाई प्रमुख प्रतिपक्षी दल नेपाली कांग्रेस नेता तथा पूर्वप्रधानमन्त्री शेरबहादुर देउवालाई भेट्न पठाएका छन् ।

ओलीले पार्टी फुटाएर कांग्रेससँगको गठबन्धनमा सरकार बनाउने हल्ला चलिरहेका बेला उनले नेता नेम्वाङलाई देउवाकहाँ पठाएका हुन् । तर नेम्वाङले देउवासँगको भेटघाट सत्ता परिवर्तनको खेलसँग कुनै पनि हिसाबले नजोडिएको बताए ।

उनले भने, देशमा यति गम्भीर विषयहरू उठिरहेका बेला प्रमुख प्रतिपक्षी दलको नेतासँग प्रधानमन्त्रीले कुरा गर्नुपर्छ कि पर्दैन ? प्रधानमन्त्रीले अहिलेका यी सबै सन्दर्भमा हाम्रो तर्फबाट पनि हेलो भन्देउ है भन्नुभयो म गएर उहाँलाई भेटेँ हेलो भनेर आएँ ।