संघीय संसदमा सरकारको नीति तथा कार्यक्रम आज प्रस्तुत हुदैं

काठमाडौं । सरकारले आज आगामी आर्थिक वर्ष २०७७÷०७८ को नीति तथा कार्यक्रम आज संसदमा प्रस्तुत गर्दैछ । राष्ट्रपति विद्यादेवी भण्डारीले सरकारका तर्फबाट आज दिउँसो ४ बजे नयाँ बानेश्वर स्थित संसद भवनमा नीति तथा कार्यक्रम प्रस्तुत गर्ने कार्यसूचि तय भएको छ ।

संघीय संसदका दुवै सदनको संयुक्त बैठकमा राष्ट्रपति भण्डारीले नीति तथा कार्यक्रम प्रस्तुत गर्नेछिन् । कोभिड १९ का कारण देश आक्रान्त बनिरहेका बेला राष्ट्रपति भण्डारीको संसद भवनमा उपस्थिती तामझामकै साथ गराउने र सोही अनुसार नै नीति तथा कार्यक्रम प्रस्तुत गर्ने गरी सरकारले तयारी थालेको छ । विषम परिस्थितीमा विगतकै वर्षहरुको शैलीमा तामझामका साथ नीति तथा कार्यक्रम प्रस्तुत गर्ने गरी सरकारले गरेको तयारीका कारण संसदका कर्मचारी र सांसदहरु भने असन्तुष्ट देखिएका छन् । भलैं, उनीहरुले बोलिहालेका भने छैनन् । 

'मेरो सरकार'को पूनरावृत्ति हुने
गत वर्षको नीति तथा कार्यक्रम प्रस्तुत गर्ने बेला राष्ट्रपति भण्डारीले मेरो सरकार भनेर सम्बोधन गरेपछि निक्कै विवाद भएको थियो । राजतन्त्रात्मक ब्यवस्थामा राजाहरुले सरकारको नीति तथा कार्यक्रम प्रस्तुत गर्दा मेरो सरकार भनेर सम्बोधन गर्ने गरिन्थ्यो ।

तर गणतन्त्रात्मक ब्यवस्थामा पनि सरकारले मेरो सरकार भनेर राष्ट्रपतिले सम्बोधन गर्दा पूरानै रजतन्त्रात्मक ब्यवस्थाको झल्को दिएको भन्दै प्रतिपक्षी लगायत सत्तारुढ दलकै पनि आपत्ति रहेको थियो । तर यसपटक पनि राष्ट्रपति विद्यादेवी भण्डारीलाई नीति तथा कार्यक्रम प्रस्तुत गराउदा मेरो सरकार नै भनेर सम्बोधन गर्ने गरी तयारी गरिएको सरकारी स्रोतको भनाई छ ।

प्रधानमन्त्री रोजगार कार्यक्रम परिमार्जन हुने
कोरोना आतंकपछि अर्थतन्त्रमा परेको प्रभाव र बढ्दो बेरोजगारीको अ वस्थालाई मध्यनजर गर्दै सरकारले प्रधानमन्त्री रोजगार कार्यक्रमलाई परिमार्जन गरी लागु गर्न खोजेको छ । विगतमा प्रधानमन्त्री रोजगार कार्यक्रम विवादित बनेको थियो । सरकारले यो कार्यक्रम अन्र्तगत रहेर कृषि क्षेत्रमा जथाभावी ब्यानर राख्दै प्रधानमन्त्री रोजगार कार्यक्रमको नाममा नौटंकी मात्र देखाईएको भन्दै ब्यापक आलोचना भएको थियो । जसकाकारण यो कार्यक्रमलाई परिमार्जन गरेर लैजाने योजनामा सरकार देखिएको छ ।

त्यस्तै कृषि क्षेत्रमा रोजगारीको सम्भाब्यता अध्ययन गर्ने र कृषिमै रोजगारीको अवसर दिलाउने गरि सरकारले ब्यापक मात्रामा कृषिमा रोजगारीको अवसर सिर्जना गर्ने गरी नीति तथा कार्यक्रम ल्याउन खोजेको छ । त्यस्तै, लकडाउनका कारण थिलोथिलो भएको नेपालको अर्थतन्त्रलाई पूर्नजिवित गर्न र त्यसको रुपान्तरणका लागि पनि सरकारले नीति तथा कार्यक्रममा अर्थतन्त्र रुपान्तरणका विषयमा कार्यक्रम समेटेको बताएको छ ।