अस्पताल भित्रै नाचगान गर्छन कोरोना संक्रमित

बुटवल । लुम्बिनी प्रादेशिक अस्पतालसित समन्वयमा प्रदेश सरकारले रामनगरस्थित धागो कारखानामा सञ्चालन गरेको कोरोना अस्पलालमा उपचार गराइरहेका कोभिड–१९ संक्रमित २५ वर्षीय युवाले सबैको ध्यान खिचेका छन् ।

उनको दैनिकी बिरामीको जस्तो छैन । उनी नाचगान गरेर दिन बिताइरहेका छन् । ‘संक्रमित भइहालियो,’ उनी भन्छन्, ‘अब खुसी भएर यसलाई जित्नु छ ।’ रुपन्देहीको कोटहीमाई गाउँपालिका १ का युवाले आत्मबल बढाउन रमाइरहेको बताए । गत शुक्रबार काठमाडौंमा उनको स्वाब परीक्षण गरिएको थियो । त्यसबाट उनमा कोरोना संक्रमण पुष्टि भएको थियो । लगत्तै उनलाई कोरोना अस्पतालमा भर्ना गरिएको थियो । अस्पतालमा उनीमात्र छन् । एक्लै भएकाले निराश हुन नदिन उनलाई काउन्सिलिङ गर्ने र गीत बजाइने गरिएको छ ।

मन पर्ने गीत बजेपछि शय्यामा रहेका युवा उठेर नाच्न थाल्छन् । त्यहाँ कार्यरत नर्सले उनी नाचिरहेको भिडियो सामाजिक सञ्जालमा सार्वजनिक गरेका हुन् । अहिले उनको भिडियो सामाजिक सञ्जालमा ‘भाइरल’ भइरहेको छ । ‘कोरोना लाग्यो भन्ने सुनेपछि छाँगाबाट खसेझै‌ं भएँ,’ ती युवाले अस्पतालका चिकित्सक र नर्सलाई भन्ने गरेका छन्, ‘यहाँ आएपछि रमाउन सिक्दैछु ।’ लुम्बिनी अस्पतालका मेडिकल सुपरिटेन्डेन्ट डा. राजेन्द्र खनालले बिरामीलाई सकरात्मक ऊर्जा दिन नर्स तथा चिकित्सकीय टोली खटिएको बताए । ‘बिरामीलाई एक्लै बस्दा निराशा नहोस भनेर अस्पताललाई संगीतमय बनाएका छौं,’ उनले भने, ‘नियमित परामर्श र छलफल पनि गरेका छौं ।’

संक्रमित युवाको संगीतमा रुची भएकाले नाच्‍ने गाउने गरेको उनले बताए । अस्पतालमा १६ जनाको चिकित्सकीय टोली छ । ‘पहिलो दिन केही हतास थिए,’ खनालले भने, ‘अहिले उनी ठीक छन् । हाँसेर बोल्छन् ।’ संक्रमित युवा भारतको दिल्लीमा रोजगारी गर्थे । लकडाउन लम्बिएपछि दिल्लीबाट नेपाल आएका थिए । उनी गत बैशाख ४ गते सिमावर्ती सम्मरीमाई गाउँपालिका–२ स्थित ठोटरी नाकाबाट राति लुकेर मुलुक प्रवेश गरेका थिए । उनलाई वैशाख ५ गते दिँउसो आफ्नै दाइले मझगावा आदर्श माविको क्वारेन्टाइन पुर्‍याएका थिए । उनमा कोरोनाका लक्षण देखिएको छैन । कोरोना अस्पतालका चिकित्सक सुशर्दन थापाले उनले रमाएर रोगलाई जित्ने प्रयास गरिरहेको बताए । कान्तिपुर दैनिकमा समाचार छ ।