कोरोनाको संक्रमणबाट अमेरिकामा थप एक नेपालीको मृत्यु

अमेरिका । विश्वव्यापीको महामारीको रुपमा फैलिरहेको कोरोना भाइरस (कोभिड १९) संक्रमणबाट अमेरिकामा थप एक नेपालीको मृत्यु भएको छ ।

सोलुखुम्बुको सोताङ गाउँपालिका–४ दिम्बल घर भएका ङिमा तम्बा शेर्पाको मृत्यु भएको हो । उनी विगत ३ वर्षदेखि अमेरिका बस्दै थिए ।  ङिमाको बुधबार बिहान उपचारका क्रममा क्विन्सको एल्मर्स्ट अस्पतालमा मृत्यु भएको उनका दाजु ल्हाक्पा युला शेर्पाले पुष्टि गरेको संयुक्त शेर्पा संघ अमेरिकाले जनाएको छ ।  शेर्पाका एक छोरा र एक छोरी छन् ।

शेर्पाको मृत्युसँगै अमेरिकामा कोरोनाका कारण मृत्यु हुने नेपालीको संख्या दुई पुगेको छ । यसअघि ५० वर्षीय अनिल सुब्बाको पनि कोरोना संक्रमणले मृत्यु भएको थियो । अमेरिकामा रहेका नेपाली हाल सम्म के कति संक्रमित भए त्यो भने अहिले सम्म खुल्न सकेको छैन् ।