रोटरी ईन्टरनेस्नलद्वारा भरतपुर कोरोना बिशेष अस्पताललाई सहयोग

चितवन । रोटरी ईन्टरनेस्नल डिष्ट्रिक्ट ३२९२ र रोटरी क्लब दरबारमार्गले रोटरी क्लव अफ चितवन मार्फत यहाँका चार अस्पताललाई व्याक्तिगत सुरक्षा सामाग्री (पिपिई)हरु सहयोग गरेको छ । क्लबले आज यहाँ एक कार्यक्रमका बिच भरतपुर कोरोना बिशेष(अस्थाई) अस्पताल, भरतपुर अस्पताल, चितवन मेडीकल कलेज र कलेज अफ मेडीकल साईन्सेजलाई सामाग्री हस्तान्तरण गरिएको हो ।

रोटरी क्लब अफ चितवनका अध्यक्ष राजु पौडेल, पूर्ब अध्यक्ष मित्रराज दवाडी, उपाध्यक्ष प्रा.डा.कृष्ण पौडेल र प्रा.डा. हरिशचन्द्र न्यौपानेले ती अस्पतालहरुलाई ५० थान पिपिई, ६० थान रवरको जुत्ता र एउटा पानीको फिल्टर हस्तान्तरण गर्नुभएको हो । कोरोना अस्पतालका संयोजक भरतपुर महानगरपालिका प्रमुख रेनु दाहाललाई १४ थान पिपिई, १५ थान जुत्ता र एक थान फिल्टर उपलव्ध गराईएको हो ।

त्यसैगरि भरतपुर अस्पतालका प्रमुख मेडीकल सुपरिटेण्डेन्ट डा. श्रीराम तिवारी, चितवन मेडीकल कलेजका निर्देशक डा. दयाराम लम्साल र कलेज अफ मेडीकल साईन्सेजका निर्देशक डा. मनोहर प्रधानलाई १२÷१२ थान पिपिई र १५÷१५ थान जुत्ता हस्तान्तरण गरिएको हो । ती सामाग्री रु ४ लाख बराबरका रहेका छन् ।

यस्तै भरतपुर कोरोना नियन्त्रण कार्यदललाई जिल्लाका अस्पतालमा सहयोग गर्ने गरि लायन्स क्लव अफ नारायणगढ बालकुमारी र नारायणी मोटर्स नारायणगढले रु ९८ हजार बराबरको १४ थान पिपिई आजै हस्तान्तरण गरेको छ ।

क्लबका अध्यक्ष हरेराम पौडेल, पूर्ब अध्यक्ष ईश्वरराज राजभण्डारी, नारायणी मोटर्सका संञ्चालक बालगोपाल चुके, अनुसा चुके, अभिषेक चुके र आयुशा चुकेले कार्यदलका संयोजक रेनु दाहाल र सदस्य एबं प्रमुख जिल्ला अधिकारी नारायण प्रसाद भट्टराईलाई ती सामाग्री हस्तान्तरण गर्नुभयो ।

त्यसैगरि सपना भिलेज सोसियल ईम्प्याक्टले चिकित्सक संघ चितवनका अध्यक्ष डा. प्रकाश खतिवडालाई रु २५ हजार बराबरको माक्स हस्तान्तरण गरेको छ । संस्थाका अध्यक्ष ध्रुब गिरिले ती सामाग्री हस्तान्तरण गर्नुभएको हो ।