पूर्व डिआइजी महेशविक्रम शाहविरुद्ध अख्तियारद्वारा मुद्दा दायर

काठमाडौ । अख्तियार दुरुपयोग अनुसन्धान आयोगले पूर्व प्रहरी नायव महानिरीक्षक (डिआइजी) महेशविक्रम शाह लगायत ४ जनाविरुद्ध आरोपपत्र दायर गरेको छ । आयोगले मंगलबार शाहसहित ४ जनाविरुद्ध  आर्थिक अनियमितता गरेको भन्दै आरोपपत्र दायर गरेको हो । 

शाहमाथि मध्य क्षेत्रीय प्रहरी तालिम केन्द्र चितवन भरतपुर र मध्य क्षेत्रीय प्रहरी तालिम केन्द्र दुधौली (सिन्धुली) मा कार्यरत रहँदा आर्थिक अनियमितता गरेको आरोप लगाइएको छ । शाहसहित लेखापाल प्रहरी नायब निरीक्षक दिपेन्द्रप्रसाद पनेरु, लेखा सहायक (प्रहरी हवल्दार) केशवसिंह ऐर र कोष तथा लेखा नियन्त्रक सञ्जिव विशंखेमाथि आर्थिक अनियमितता गरेको भन्दै आरोपपत्र दायर गरिएको हो ।

शाह, पनेरु र लेखा सहायकसमेतको मिलेमतोमा अन्यत्र सरुवा भई सकेका प्रहरी जवानहरुको ०७२ साल माघ र फागुन महिनाको तलव भत्ता भ्रष्टाचार गरेको भन्ने उजुरीका आधारमा अरोपपत्र दायर गरिएको अख्तियारको दाबी छ । मध्य क्षेत्रीय प्रहरी तालिम केन्द्र, दुधौली सिन्धुलीमा कार्यरत हुँदा आर्थिक वर्ष २०७२/०७३ मा शाह कार्यालय प्रमुखको रुपमा कार्यरत थिए भने पनेरु लेखापाल प्रहरी नायब निरीक्षक तथा ऐरी लेखा सहायक पदमा कार्यरत थिए ।