खुमलटारमा सकियो प्रधानमन्त्री ओली बाहेक नेकपा शीर्ष नेताको छलफल

काठमाडौं । चितवन जाने तयारीमा रहेका नेकपा अध्यक्ष प्रचण्डसँग पार्टीका वरिष्ठ नेताहरु झलनाथ खनाल, माधव नेपाल र उपाध्यक्ष वामदेव गौतमको भेट वार्ता भएको छ ।

शुक्रबार बिहान भएको चार नेताको भेटवार्ता पार्टीमा पछिल्लो समय देखिएको असहजताका विषयमा केन्द्रीत रहेर छलफल भएको स्रोतको भनाई छ । छलफलका लागि बिहानै नेता गौतम पहिले, त्यसपछि नेपाल र अनि खनाल प्रचण्ड निवास खुमलटार पुगेका थिए ।

उनीहरुबीच झण्डैं सवा घण्टा छलफल भएको बताइन्छ । गत बुधबार सचिवालय बैठकले उपाध्यक्ष वामदेव गौतमलाई राष्ट्रिय सभा सदस्यमा मनोनित गर्नका लागि राष्ट्रपतिलाई सिफारिस गरी पठाउन गरेको निर्णयलाई प्रधानमन्त्री ओलीले चुनौती दिने बताएपछि नेकपामा गम्भिर विवाद देखिएको छ । ओली अर्थमन्त्री युवराज खतिवडालाई नै राष्ट्रिय सभामा पठाउन चाहिरहेका छन् । तर ओली सहितको पार्टी सचिवालय बैठकले गौतमलाई पठाउने निर्णय गरेको छ ।

पार्टीमा देखिएको यो विवाद पछि प्रधानमन्त्रीले वरिष्ठ नेता नेपाललाई बोलाई खतिवडालाई नै आफुले राष्ट्रिय सभामा पठाउने र पार्टी निर्णय अवज्ञा गर्ने चेतावनी दिएका थिए । नेता नेपालले भने पार्टी निर्णय मानेर जानुको विकल्प नरहेको भन्दै संयमता अवलम्वन गर्न प्रधानमन्त्रीलाई सुझाव दिएका थिए ।

आवश्यक परे फेरि यो विषयमा सचिवालय बैठक बोलाएर छलफल गरौं, तर पार्टी निर्णय मान्दिन भन्ने कुरा नगरौं भन्दै नेपालले ओलीलाई सुझाव दिएका थिए । खतिवडा की गौतम भन्नेमा अहिले नेकपाभित्र अब प्रतिष्ठाको विषय बनेको छ ।

यो विषयमा अब कसरी जाने भन्नेमा खुमलटारमा नेताहरुले छलफल गरेका हुन् । प्रधानमन्त्रीसँगै यस विषयमा छलफल गरेर जाने पनि नेताहरुका बीचमा छलफल भएको बुझिएको छ । प्रचण्ड आजै चितवन जाने कार्यक्रम छ ।