फ्रान्स पठाइदिने भन्दै ठगी गर्ने महिला प्रहरीको फन्दामा

काठमाडौं । फ्रान्स पठाइदिने भन्दै तीन जनाको ३८ लाख ५० हजार ठगी गरेको आरोपमा एक महिलालाई प्रहरीले पक्राउ गरेको छ । 

पक्राउ पर्नेमा रुपन्देही घर भई हाल काठमाडौंका तारकेश्वर नगरपालिका १९ स्थित मनमैजु बस्ने पूर्णीमा श्रीष रहेको प्रहरीले जनाएको छ । उनले  फ्रान्समा (प्याकिङ फुड) काममा आकर्षक तलव हुने भन्दै विभिन्न प्रलोभनमा पारी शीरबहादुर थापालगायत ३ जना व्यक्तिहरुको ३८ लाख पचास हजार लिएर फरार भएकी थिइन् । 

यसबारे महानगरीय अपराध महाशाखामा थापाले उजुरी दिएपछि खोजतलासको क्रममा मनमैजुबाटै पक्राउ गरिएको महाशाखाका प्रहरी उपरीक्षक मुकेशकुमार सिंहले जानकारी दिए । उनलाई आवश्येक अनुसन्धान तथा  कारवाहीको लागि महानगरीय प्रहरी परिसर काठमाडौँ पठाइएको उनले जानकारी दिए ।