सुदूरपश्चिम प्रदेशका ११ स्थानमा विमानस्थल सञ्चालन गरिने

कैलाली । संस्कृति, पर्यटन तथा नागरिक उड्डयनमन्त्री योगेश भट्टराईले सुदूरपश्चिम प्रदेशका ११ स्थानमा विमानस्थल सञ्चालन गरिने बताएका छन् । 

शनिबार धनगढीमा आयोजित धनगढी विमानस्थल गुरु योजना प्रस्तुतीकरण कार्यक्रममा मन्त्री भट्टराईले प्रदेशका विभिन्न ११ स्थानमा विमानस्थल सुरु हुने आश्वासन दिए । ‘कहीँ काम भइरहेको छ । कहीँ कामको तयारी भइरहेको छ,’ उनले भने, ‘हामी प्रदेशका ११ स्थानमा विमानस्थल सुरु गर्ने तयारीमा छौँ ।’

नौ जिल्ला रहेको सुदूरपश्चिम प्रदेशमा हाल धनगढी विमानस्थल मात्रै चालु अवस्थामा छ ।

मन्त्री भट्टराईले धनगढी विमानस्थल विस्तारसँगै तत्काल कञ्चनपुरको मझगाउँ र कैलालीको टीकापुरमा बन्द अवस्थामा रहेको विमानस्थल पनि सुचारु गर्ने आश्वासन दिए ।
‘धनगढीलाई हामी विस्तार गर्छौं । टीकापुर र र मझगाउँमा बन्द रहेको विमानस्थल सुरु हुन्छ,’ उनले भने, ‘पहाडी जिल्लामा पनि अधिकांश ठाउँमा कालोपत्रेको काम भइरहेको छ ।’