ओली–प्रचण्डको निर्णायक वार्ता सकियो, के आयो नतिजा ?

काठमाडौँ । प्रतिनिधि सभाको सभामुखको उम्मेदवार छान्नेबारे प्रधानमन्त्री केपी शर्मा ओली र नेपाल कम्युनिष्ट पार्टीका अर्का अध्यक्ष पुष्पकमल दाहालबीच भएको निर्णायक वार्ता सकिएको छ । वार्ताले कुनै नतिजा निकालेन । वार्ता सकारात्मक अवस्थामा सकिएको हो । 

निर्णायक वार्ताले सभामुख टुंग्याउन नेकपा सचिवालय बैठक अपराह्न ४ बजे बस्ने निर्णय गरेको छ । 

दुई अध्यक्षबीच प्रधानमन्त्रीनिवास बालुवाटारमा आइतबार बिहान झन्डै २ घन्टा बढी एक्लाएक्लै भेट भएको थियो। भेटले निष्कर्ष दिन नसकेपछि फेरि साँझ चार बजे बस्ने सचिवालयको बैठक बस्ने भएको नेकपाका एक नेताले जानकारी दिए । 

बालुवाटार स्रोतका अनुसार साँझ ४ बजेका लागि सचिवालय बैठक डाकिएको छ । 

यसअघि सभामुख चयनमा सहमति हुन नसक्दा ४ पटकसम्म संसद बैठक सूचना टाँसेर स्थगित भइसकेको छ। पुस ४ गते संसदको हिउँदे अधिवेशन सुरू भए पनि सभामुख चयनमा सहमति हुन नसक्दा संसद अवरूद्ध हुँदै आएको छ।