उपनिर्वाचन २०७६ : उनान्सय वर्षीय वृद्धद्वारा मतदान

काठमाडौं । बैतडीमा पुर्चौडी नगरपालिका– ४ मा शनिबार भएको उपनिर्वाचनमा ९९ वर्षीय वृद्धले मतदान गर्नुभएको छ । 

पुर्चौडी नगरपालिका– ४ स्थित महादेव मावि सिबावो मतदानस्थलबाट ९९ वर्षीय बिरुवा धानुकले मतदान गरेको बैतडीका प्रमुख जिल्ला अधिकारी आनन्द पौडेलले जानकारी दिनुभयो ।  धानुकले शनिबार साढे १ बजे मतदान गर्नुभएको हो । मतदानमा सहभागी वृद्धले आफूले देश विकासको लागि लागि पर्ने उम्मेदवारलाई मतदान गरेको बताउनुभयो । 

यस्तै सुर्नया गाउँपालिका– १ मा रहेको साविकको गाविस भवन गुर्केली मतदानस्थलबाट ९६ वर्षीय महावीर चन्दले पनि मतदान गर्नुभएको छ ।  उहाँले बिहान ११ बजेर ३७ मिनेटमा मतदान गर्नुभएको हो । दोगडाकेदार गाउँपालिका– ४ को  श्रीकेदार मावि पिपलकोटबाट ९१ वर्षीया पार्वती भट्टले पनि मतदान गर्नुभएको जिल्ला निर्वाचन कार्यालय बैतडीले जनाएको छ ।