‘नेपालीहरूको ज्ञान, सीप र अनुभवलाई देशसँग जोड्छौँ’: परराष्ट्र मन्त्री खनाल

काठमाडौँ । परराष्ट्र मन्त्री शिशिर खनालले प्रवासमा रहेका नेपालीहरूको ज्ञान, सीप र अनुभवलाई देशसँग जोड्ने बताएका छन्।

बेइजिङस्थित नेपाली दूतावासले आयोजना गरेको कार्यक्रममा सम्बोधन गर्दै मन्त्री खनालले विदेशमा रहेका नेपालीहरूलाई विकास यात्राका साझेदार बन्न आग्रह गरेका हुन् ।

उनले नेपाल अहिले विशेष परिस्थितिबाट गुज्रिरहेको उल्लेख गर्दै ठूलो जनमतका साथ रास्वपा नेतृत्वको सरकार गठन भएको बताए। विदेशमा रहेका नेपालीहरूले निर्वाचनका क्रममा रास्वपालाई गरेको समर्थनप्रति आभार व्यक्त गर्दै उनले सरकारले जनअपेक्षाअनुसार काम गरिरहेको दाबी गरे।

मन्त्री खनालले नेपालमा सुशासनको अभाव रहेकाले आफ्नो दलले सुरुदेखि नै सुशासनलाई प्रमुख एजेन्डा बनाएको बताए। भ्रष्टाचारविरुद्ध कडा रूपमा प्रस्तुत हुनु आवश्यक रहेको उल्लेख गर्दै उनले आर्थिक समृद्धि र विकासलाई सरकारले प्राथमिकतामा राखेर काम गरिरहेको बताए।

भ्रष्टाचारसँग सम्बन्धित विभिन्न काण्डका फाइल खुल्ने विषयमा सार्वजनिक बहस भइरहेका बेला सरकारले त्यसतर्फ पनि काम अघि बढाइरहेको उनको भनाइ थियो। तत्काल सबै परिणाम देखिन नसके पनि निश्चित समयपछि सरकारले गरेका कामको सकारात्मक नतिजा देख्न सकिने विश्वास उनले व्यक्त गरे।