कांग्रेसमा एक लाख ४९ हजार ३०९ जनाको क्रियाशील सदस्यता नविकरण गर्न म्याद थप

काठमाडौं । प्रमुख प्रतिपक्षी दल नेपाली कांग्रेसको क्रियाशील सदस्य जम्माजम्मी ६ लाख ८७ हजार ९३१ जना हुने भएको छ । कांग्रेसले हिजो मध्यरातसम्म क्रियाशील सदस्यता नविकरणका लागि समयावधी तोकेको थियो । 

जसअवधीमा हालसम्म पाँच लाख ३८ हजार ६२२ जनाले वडा सभापतिमार्फत क्रियाशील सदस्यको डिजिटल परिचयपत्र प्राप्त गरिसकेको कांग्रेसले जनाएको छ । बाँकी एक लाख ४९ हजार ३०९ सदस्यले स्वयं सदस्यता अद्यावधिक फाराम पेस गरिसकेको र उनीहरुको वडा सभापतिमार्फत नवीकरणको काम भईरहेको कांग्रेसले जनाएको छ । 

अहिले बिहान उसले वक्तब्य जारी गरेर यस्तो तथ्यांक सार्वजनिक गरेको हो । नवीकरण भई डिजिटल परिचयपत्र प्राप्त भईसकेका र सदस्यता अध्यावधिकका लागि वडा सभापतिसमक्ष फारम पेश गरिसकेका सम्म गरेर कांग्रेसको क्रियाशील सदस्य संख्या ६ लाख ८७ हजार ९३१ पुग्ने देखिएको हो । यस अगाडी कांग्रेसको क्रियाशील सदस्य सात लाख ८२ हजार २०९ थिए । यो अवधीमा कांग्रेसको झण्डै एक लाख क्रियाशील सदस्य घट्ने देखिएको हो । 

कांग्रेसले शुक्रबार बिहान जारी गरेको विज्ञप्‍तिअनुसार क्रियाशील सदस्यता अद्यावधिक गर्न यही जेठ २८ गते राति १२ बजेसम्मको समयसीमा निर्धारण गरिएकामा अर्को सूचना जारी नभएसम्म क्रियाशील सदस्यता वितरणको म्याद बढाइएको छ।