बजेटले अर्थतन्त्र सुधारको सही दिशातर्फ संकेत गरेको छ: अध्यक्ष श्रेष्ठ

काठमाडौँ । नेपाल उद्योग वाणिज्य महासंघका अध्यक्ष अञ्जन श्रेष्ठले आगामी आर्थिक वर्ष २०८३-८४ को बजेटले आर्थिक सुधारतर्फ सकारात्मक दिशा लिएको बताएका छन्।

महासंघले सोमबार आयोजना गरेको नीति संवाद कार्यक्रममा बोल्दै अध्यक्ष श्रेष्ठले लगानीमैत्री वातावरण निर्माण, उत्पादन वृद्धि र स्वदेशमै रोजगारी सिर्जनाको लक्ष्यतर्फ बजेट अग्रसर देखिएको बताए।

उनका अनुसार लामो समयदेखि नेपाली अर्थतन्त्र संरक्षणमुखी प्रवृत्ति, अनौपचारिक कारोबार र प्रशासनिक जटिलतामा सीमित रहँदै आएको थियो। तर, यस पटकको बजेटले त्यस्तो संरचनात्मक समस्याबाट बाहिर निस्कने प्रयास गरेको उनले टिप्पणी गरे।

श्रेष्ठले बजेट कार्यान्वयनको पक्ष भने महत्वपूर्ण रहने उल्लेख गर्दै यसको प्रभावकारी कार्यान्वयनमा नै वास्तविक परिणाम निर्भर रहने बताए। उनले अहिलेको अर्थतन्त्रमा बैंकिङ प्रणालीमा लगानीयोग्य रकम अधिक रहेको र ब्याजदर ऐतिहासिक रूपमा न्यून बिन्दुमा पुगेको अवस्थामा समेत निजी लगानी अपेक्षाकृत कमजोर देखिएको उल्लेख गरे।