पार्टी एकता कायम राख्न डा. शेखर कोइरालाले राखे ५ प्रस्ताव

काठमाडौ । नेपाली कांग्रेसमा एकता कायम राख्न डा. शेखर कोइरालाले पार्टी सभापति र पदाधिकारीसमक्ष ५ प्रस्ताव राखेका छन् ।

उनले १५औँ महाधिवेशनका लागि क्रियाशील सदस्यता अद्यावधिकलाई अनिवार्य नगर्न र १४औँ महाधिवेशनपछिका सदस्यताकै आधारमा निर्वाचन गर्नुपर्ने प्रस्ताव गरेका छन् ।

यस्तै, केन्द्रीय कार्यसमिति समायोजन, कार्यसम्पादन समितिमा सभापतिको बहुमत र विभिन्न समितिहरू आपसी सहमतिमा गठन गर्नुपर्ने कोइरालाको भनाइ छ ।
पुस अन्तिम साता भएको विशेष महाधिवेशनपछि विवादमा रुमलिएको नेपाली कांग्रेसमा एकता कायम राख्न नेता डा. शेखर कोइरालाले ५ प्रस्ताव राखेका छन् । 

आफूलाई भेट्न आएका सभापति गगन थापा, महामन्त्री प्रदीप पौडेललगायतसँग डा. कोइरालाले पार्टीका एकता कायम राख्न भन्दै ५ प्रस्ताव राखेको सचिवालयले जानकारी दिएको हो । 

डा. कोइरालाले रातोपाटीसँग आइतबार भएको कुराकानीमा पनि आफूले पार्टीमा एकता कायम राख्नका लागि केही प्रस्ताव सभापति र पदाधिकारीसमक्ष राखेको बताएका थिए । ‘मलाई वरिष्ठ नेता चाहिएको छैन । पार्टीमा एकता कायम राख्नुपर्छ भनेको छु । त्यसका लागि गर्नुपर्ने केही काम पनि मैले पार्टी पदाधिकारीलाई दिएको छु,’ कोइरालाले भनेका थिए । 

कोइरालालाई चैत २२ गते महामन्त्री प्रदीप पौडेल र वैशाख २३ गते सभापति गगन थापाले उनकै सम्पर्क कार्यालय विशालनगरमा पुगेर भेटेका थिए । ती भेट र त्यसपछि पार्टी नेतृत्व र पदाधिकारीसँग भएका अनौपचारिक कुराकानीमा कोइरालाले यी प्रस्ताव राखेका स्वकीय सचिव दिनेशचन्द्र थपलियाले जानकारी दिए । 

यस्ता छन्, कोइरालाका पार्टी एकता कायम राख्न गर्नुपर्ने ५ प्रस्ताव
१) १५औँ महाधिवेशनको लागि क्रियाशील सदस्यता अद्यावधिकलाई अनिवार्य नगर्ने ।

२) १४औँ महाधिवेशन पछाडि नवीकरण गरिएका र वितरण गरिएका क्रियाशील सदस्यता कै आधारमा १५औँ महाधिवेशन गर्ने ।

३) १४औँ महाधिवेशनको केन्द्रीय कार्यसमिति र विशेष महाधिवेशनको केन्द्रीय कार्यसमितिलाई समायोजन गरेर एउटै बनाउने ।

४) कार्य सम्पादन समिति सभापतिको बहुमत हुनेगरी गठन गर्ने ।

५) निर्वाचन समिति, क्रियाशील सदस्यता छानबिन समिति, अनुशासन समिति, विधान समिति र अन्य समितिहरु आपसी सहमतिबाट मात्रै बनाउने ।