भारतमा फेरि बढ्यो पेट्रोल र डिजेलको मूल्य, १० दिनमा तेस्रो पटक वृद्धि

एजेन्सी । भारतमा इन्धनको मूल्यमा वृद्धि हुने क्रम जारी रहेको छ। शनिबार पुनः पेट्रोल र डिजेलको मूल्य बढाइएको छ। पछिल्लो वृद्धिअनुसार पेट्रोल प्रतिलिटर ८७ पैसा र डिजेल प्रतिलिटर ९१ पैसा महँगो भएको छ।

समाचार एजेन्सी पीटीआईका अनुसार, राजधानी दिल्लीमा पेट्रोलको मूल्य ८७ पैसाले बढेर प्रतिलिटर ९९.५१ भारतीय रुपैयाँ पुगेको छ। त्यसैगरी, डिजेलको मूल्य ९१ पैसाले बढेर प्रतिलिटर ९२.४९ भारतीय रुपैयाँ कायम भएको छ।

मे १५ यता इन्धनको मूल्यमा वृद्धि भएको यो तेस्रो पटक हो। १० दिनको छोटो अवधिमै लगातार मूल्य बढ्नुको मुख्य कारण मध्य-पूर्वमा जारी तनावलाई मानिएको छ। मध्य-पूर्वको अशान्तिका कारण विश्वव्यापी तेल आपूर्ति शृङ्खलामा अवरोध आएपछि त्यसको प्रत्यक्ष असर भारतीय बजारमा देखिएको हो।

यस महिनाको मूल्यवृद्धिको शृङ्खला मे १५ बाट सुरु भएको थियो, जतिबेला पेट्रोल र डिजेलको मूल्यमा एकैपटक प्रतिलिटर ३ रुपैयाँ बढाइएको थियो। 

त्यसपछि मे १९ मा पुनः दोस्रो पटक करिब ९० पैसाको वृद्धि गरिएको थियो। लगातारको मूल्यवृद्धिले सर्वसाधारणको भान्सा र यातायात लागतमा थप भार थपिने देखिएको छ।