शिक्षा मन्त्रालयद्वारा पाठ्यक्रम सुधारका लागि विज्ञ कार्यदल गठन

काठमाडौँ । सरकारले राष्ट्रिय पाठ्यक्रम प्रारूप २०७६ लाई समसामयिक आवश्यकतासँग मिलाउने उद्देश्यसहित पुनरावलोकन प्रक्रिया अघि बढाएको छ।

शिक्षा, विज्ञान तथा प्रविधि मन्त्रालयले यस कार्यका लागि विज्ञहरूको सहभागितामा विशेष कार्यदल गठन गरेको छ। कार्यदलको संयोजकत्व प्रा. डा. बालचन्द्र लुइँटेललाई दिइएको छ।

सदस्यहरूमा डा. लेखनाथ पौडेल, डा. मिनाक्षी दाहाल, डा. अमिना सिंह, पवित्रबहादुर गौतम, प्रमोद भट्ट, ज्ञानेन्द्र मल्ल, सागेन्द्र श्रेष्ठ, रिचा न्यौपाने तथा रेवती कार्की रहेका छन्। 

पाठ्यक्रम विकास केन्द्रका महानिर्देशक सदस्यसचिवको भूमिकामा रहने व्यवस्था गरिएको छ। राष्ट्रिय पाठ्यक्रम तथा मूल्यांकन परिषद्को ९८औँ बैठकले गरेको निर्णयअनुसार उक्त कार्यदल गठन गरिएको मन्त्रालयले जनाएको छ। 

बदलिँदो शैक्षिक आवश्यकता, समयसापेक्षता र नैतिक शिक्षालाई समेत समेट्ने गरी पाठ्यक्रमलाई परिमार्जन गर्ने उद्देश्य रहेको उल्लेख गरिएको छ।