स्वास्थ्य मन्त्रालयका महाशाखा प्रमुखहरू हेरफेर

काठमाडौँ । स्वास्थ्य तथा जनसंख्या मन्त्रालयले उच्च तहका कर्मचारी व्यवस्थापनअन्तर्गत सरुवा, पदस्थापन तथा काज फिर्तासम्बन्धी निर्णय कार्यान्वयनमा ल्याएको छ ।

मन्त्री निशा मेहताको निर्णयअनुसार मन्त्रालयका प्रमुख महाशाखाहरूमा नेतृत्व परिवर्तन गरिएको हो । सो क्रममा यशोदा अर्याल, डा. रोशन न्यौपाने र डा. गुणनिधि शर्मालाई महाशाखा प्रमुखको जिम्मेवारीमा ल्याइएको छ । यद्यपि, उनीहरूलाई कुन–कुन महाशाखा सम्हाल्ने भन्ने विषय औपचारिक रूपमा निर्धारण हुन बाँकी रहेको जनाइएको छ ।

यससँगै मन्त्रालयमा कार्यरत केही वरिष्ठ चिकित्सकहरूलाई सम्बन्धित स्वास्थ्य संस्थामा काज फिर्ता गरिएको छ । नीति तथा योजना महाशाखाबाट डा. चुमनलाल दासलाई नारायणी अस्पताल पठाइएको छ भने स्वास्थ्य समन्वय महाशाखाका डा. भीम सापकोटालाई हेटौँडास्थित किटजन्य रोग प्रयोगशालामा खटाइएको छ ।

त्यसैगरी गुणस्तर मापन तथा निरीक्षण महाशाखाबाट डा. सरोज शर्मालाई वीर अस्पतालमै फिर्ता गरिएको छ । स्वास्थ्य बीमा बोर्डका कार्यकारी निर्देशक डा. कृष्णप्रसाद पौडेललाई पनि गजेन्द्र नारायण सिंह अस्पतालमा सरुवा गरिएको छ । तथापि, हाल कार्यकारी प्रमुखको जिम्मेवारीमा रहेकाले उनीलाई अस्थायी रूपमा बोर्डमै रहेर काम गर्न निर्देशन दिइएको छ ।

मन्त्रालयले सेवा प्रवाहलाई थप प्रभावकारी बनाउने उद्देश्यले दरबन्दीअनुसार जनशक्ति व्यवस्थापन गर्दै यस्ता निर्णयहरू अघि बढाइएको जनाएको छ ।