सम्पत्ति विवरणबारे हर्क साम्पाङले भने : ‘४–५ तोला सुन, बैंक ब्यालेन्स २–४ लाख होला’

काठमाडौँ । श्रम संस्कृति पार्टीका अध्यक्ष एवं सांसद हर्क साम्पाङले सम्पत्ति विवरणबारे आफ्नो नाममा केही नभएको बताएका छन् । 

उनले फेसबुकमार्फत आफ्नो सम्पत्ति विवरण छिट्टै सार्वजनिक गर्ने बताएका छन् ।

उनले फेसबुकमा लेखेका छन्, ‘मेरो बाउ बाजेले कमाएको पैतृक सम्पत्ति आमाको नाममा खोटाङ केपिलाश गढी २ चोखाने गाउँको पाखारेखा, खरबारी बाँस र उतीस घारी सहितको केही खेतबारी छ । गाउँ भिरालो पाखामा छ । त्यो पनि दाजु दिदीहरूले अंश लिएका छैनन् ।’ 

उनले आफ्नो नाममा जग्गाजमिन केही नभएको र सामान्य बैंक ब्यालेन्स तथा सुन मात्र रहेको प्रारम्भिक जानकारी दिएका छन् ।

जनस्तरबाट सम्पत्ति विवरण माग भएपछि उनले लेखेका छन्, ‘मेरो सम्पत्ति विवरण चाहिएको रहेछ, केही दिनपछि दिउँला । मेरो नाममा केही छैन । वैदेशिक रोजगारीबाट जोडेको ४–५ तोला सुन होला । बैंक ब्यालेन्स २–४ लाख होला, म सार्वजनिक गर्नेछु ।’