गोल्फुटारको ‘हमाल निवास’ मा डेरा सरे रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो काठमाडौंको डेरा सारेका छन् । उनी हाल बुढानिलकण्ठ नगरपालिकाको इटालीटार ६ गोल्फुटार मेनरोडस्थित ‘हमाल निवास’मा सरेका हुन् ।

उनी सोमबारबाट त्यहाँ सरेको रास्वपा स्रोतले जनाएको छ । लामिछाने यसअघि काठमाडौंको हात्तिगौडास्थित सिजी अपार्टमेन्टमा बस्दै आएका थिए। 

गत फागुन २१ को प्रतिनिधिसभा चुनावपछि उनको दल संसदमा पहिलो दल बनेर उदाएको छ । झण्डै दुई तिहाई बहुमतको नेतृत्व गरेर सरकार गठन गर्न लागेको पार्टी रास्वपाको सभापतिको हैसियतमा पछिल्लो समय बढ्दो राजनीतिक सक्रियता, सुरक्षात्मक व्यवस्थापन र भेटघाट व्यवस्थापनलाई सहज बनाउन उनी नयाँ स्थानमा सरेको रास्वपा स्रोतले जनाएको छ।

रास्वपाले चैत १२ गते बस्ने पार्टी केन्द्रीय समिति र संसदीय दलको संयुक्त बैठकबाट संसदीय दलको नेता चयन गर्ने र सरकार गठनको प्रक्रियामा अघि बढ्ने तयारी गरेको छ। पार्टीका वरिष्ठ नेता बालेन शाह लाई दल नेता चयन गर्ने र प्रधानमन्त्रीका रूपमा अघि सार्ने रास्वपाको आन्तरिक तयारी छ।

उक्त तयारी अनुसार चैत १३ गते नयाँ प्रधानमन्त्रीको रुपमा बालेनले शपथ लिने र सोही दिन क्याबिनेट मन्त्रीहरुको पनि शपथ हुने भएको छ । त्यसका लागि बालेन र पार्टी सभापति रवि लामिछानेका बीचमा सम्वाद भईरहेको छ । 

सोहीकारण सभापति लामिछानेको ब्यस्तता, सुरक्षा लगायतलाई मध्यनजर गरेर पहिले बसिरहेको स्थानबाट घरडेरा सारिएको रास्वपा स्रोतले जनाएको छ । 

कहाँ छ ‘हमाल निवास’ ?
उक्त घर बुढानिलकण्ठको इटालीटारमा रहेको गोल्फुटार मेनरोडमा पर्छ, जुन राजधानीको शान्त र उच्चस्तरीय आवासीय क्षेत्र मानिन्छ। यहाँ प्रायः उच्चपदस्थ व्यक्तिहरू, व्यवसायी तथा राजनीतिज्ञहरूको बसोबास  भएको क्षेत्रका रुपमा चिनिन्छ । यो घर कसको भन्ने खुलिसकेको त छैन । तर घरको गेटमा हमाल निवास भनेर लेखिएकोले यो घर कुनै हमाल थर भएका ब्यक्तिको हुनसक्ने बताइएको छ ।