प्रतिनिधिसभामा २३५ जना नयाँ अनुहारका सांसद

काठमाडौं । प्रतिनिधिसभामा अब २३५ जना नयाँ अनुहारका सांसद हुनेछन् । कुनै न कुनै बेला प्रतिनिधिसभामा पुगेका र अनुभव लिएका पूराना सांसद भने ४० जना मात्रै देख्न पाइनेछ । २०४८ यताका चुनावमा कुनै न कुनै रुपमा चुनाव लडेका, जितेका र संसदमा पुगेका ४० जना नेताहरुमात्रै यसपटक प्रतिनिधिसभाको अनुभव लिएका नेताहरु संसदमा हुनेछन् । 

त्यसबाहेकका अन्य सबै जसो यसपटक नयाँ सांसदहरु संसदमा देखिनेछन् । प्रत्यक्ष तर्फ १६५ मा ३१ र समानुपातिक तर्फका ११० जनामा ९ जना मात्रै पहिले पनि सासद भईसकेका नेताहरु छन् । यस हिसावले कुल २७५ मा ४० जना मात्रै पूराना र बाँकी २३५ जना नयाँ अनुहार प्रतिनिधिसभामा पुगेका छन् । ८५ दशमलव ४५ प्रतिशत संसदमा नयाँ सांसद हुनेछन् । ती सबै पहिलो पटक प्रतिनिधिसभामा हुनेछन् । १४ दशमलव ५४ प्रतिशत मात्रै यस अगाडी पनि प्रतिनिधिसभामा पुगेका सांसद हुनेछन् । 

एमालेबाट ११ जना पूराना र १४ जना नयाँ सांसद हुनेछन् । रास्वपाबाट १४ जना पूराना र १६८ जना नयाँ सांसद हुनेछन् । १६८ मध्ये ४ जना भने प्रदेश सभाको भने अनुभव भएका नेता सांसद छन् । 

कांग्रेसबाट ८ जना पूराना र ३० जना नयाँ अनुहार प्रतिनिधिसभामा हुनेछन् ।

नेकपाबाट ६ जना पूराना र ११ जना नयाँ अनुहार संसदमा हुनेछन् । जसमध्ये १ जनासँग भने प्रदेश सभाको अनुभव भने छ । र राप्रपाबाट १ जना पूराना र बाँकी ४ जना नयाँ सांसद हुनेछन् । 

श्रम सस्कृतिको भने ७ जना नै प्रतिनिधिसभाका लागि नयाँ अनुहार हुन् । यसपटकको प्रतिनिधिसभामा रास्वपाको १८२, कांग्रेसको ३८, एमालेको २५, नेकपाको १७, श्रम सस्कृतिको ७, राप्रपाको ५ र स्वतन्त्र १ को समिकरणसहितको संसद हुनेछ ।