इजरायली आक्रमणमा लेबनानमा १२ स्वास्थ्यकर्मीको मृत्यु

काठमाडौँ । इजरायली वायु सेनाको हवाई आक्रमणमा दक्षिण लेबनानको बोरज शहरस्थित प्राथमिक स्वास्थ्य केन्द्रमा १२ जना स्वास्थ्यकर्मी मारिएका छन्।

लेबनानको सार्वजनिक स्वास्थ्य मन्त्रालयले आक्रमणको पुष्टि गर्दै डाक्टर, नर्स, प्यारामेडिक तथा अन्य स्वास्थ्यकर्मीको मृत्यु भएको जनाएको छ।

त्यसैगरी दक्षिण लेबनानको अल सावाना क्षेत्रमा स्वास्थ्यकर्मीको टोलीमाथि गोली प्रहार हुँदा दुई जनाको मृत्यु भएको बताइएको छ। लेबनान सरकारले स्वास्थ्य पूर्वाधार र स्वास्थ्यकर्मीमाथिको यस्तो निरन्तर आक्रमणलाई अन्तर्राष्ट्रिय मानवीय कानुनको गम्भीर उल्लंघन भएको भन्दै कडा निन्दा गरेको छ।

स्वास्थ्य मन्त्रालयका अनुसार मार्च २ यता इजरायलको आक्रमणका कारण देशभर कम्तिमा ७ सय ७३ जनाको मृत्यु भइसकेको छ। तीमध्ये १०३ बालबालिका रहेका छन् भने घाइतेको संख्या कम्तिमा १ हजार ९ सय ३३ पुगेको मन्त्रालयद्वारा जारी विज्ञप्तिमा उल्लेख छ।