चितवनमा मतदान गरेर ‘प्रचण्ड’ रुकुम पूर्व जाने

काठमाडौँ । प्रतिनिधि सभा निर्वाचनको मतदान दिनमै नेपाली कम्युनिस्ट पार्टीका संयोजक तथा रुकुम पूर्वबाट उम्मेदवार बनेका पुष्पकमल दाहाल मतदान स्थलबाटै आफ्नो निर्वाचन क्षेत्रतर्फ प्रस्थान गर्ने कार्यक्रम तय भएको छ।

पार्टी स्रोतका अनुसार उनको स्थायी बसोबास रहेको चितवनमा मताधिकार प्रयोग गरेलगत्तै उनी हेलिकप्टरमार्फत रुकुम पूर्व पुग्नेछन्। निर्धारित कार्यतालिका अनुसार बिहान ११ बजेसम्म उनी निर्वाचन क्षेत्रमा उपस्थित हुने तयारी गरिएको छ।

उक्त भ्रमणमा उनकी छोरी गंगा दाहालसहित पाँच सदस्यीय टोली रहने जानकारी पार्टीका चुनावी प्रचारप्रसार प्रमुख गणेशमान पुनले दिएका छन्।

पूर्वप्रधानमन्त्रीसमेत रहेका दाहाल प्रतिस्पर्धा गरिरहेको रुकुम पूर्व निर्वाचन क्षेत्रमा कुल ११ जना उम्मेदवार चुनावी प्रतिस्पर्धामा रहेका छन्। निर्वाचन आचारसंहिताअनुरूप मतदान सम्पन्न भएपछि उम्मेदवारहरूको क्षेत्रगत गतिविधि केन्द्रित रहने क्रम जारी रहेको छ।