प्रलोपा र मितेरी पार्टीका उम्मेदवार नै नेकपामा समाहित

काठमाडौँ । कञ्चनपुर निर्वाचन क्षेत्र नम्बर १ मा चुनावी सरगर्मीका बीच देखिएको दल परिवर्तनले चुनावी समीकरणबारे नयाँ बहस सुरु भएको छ । 

प्रगतिशील लोकतान्त्रिक पार्टी (प्रलोपा) र मितेरी पार्टी नेपालका उम्मेदवारसहित ५५ जना नेता कार्यकर्ता नेपाल कम्युनिष्ट पार्टी (नेकपा)मा प्रवेश गरेपछि यसको प्रभाव कति पर्ला भन्ने चासो बढेको हो ।

नेकपा केन्द्रीय सदस्य जीवनराज थापाका अनुसार, प्रलोपाबाट प्रतिनिधि सभा सदस्यका उम्मेदवार दीपेन्द्रबहादुर शाहीले पार्टी परित्याग गर्दै नेकपा प्रवेश गरेका छन् । 

शाहीसँगै प्रलोपाका कञ्चनपुर जिल्ला संयोजक अमरसिंह विष्टसहित ५४ जना नेता कार्यकर्ता नेकपामा समाहित भएको बताइएको छ । शाही र विष्ट दुवै प्रलोपाका केन्द्रीय सदस्यसमेत थिए । यस्तै, मितेरी पार्टी नेपालबाट प्रतिनिधि सभा सदस्यका उम्मेदवार सियाराम रानाले पनि नेकपा प्रवेश गरेका छन् । 

२७ वर्षीय जेन जेड पुस्ताका उम्मेदवार रानाले नेकपामा समाहित भएको घोषणा गरेका छन् । दुई जना उम्मेदवारसहित केही नेता कार्यकर्ताहरू नेकपा प्रवेश गर्नुले कञ्चनपुर क्षेत्र नं १ मा नेकपाबाट प्रतिनिधि सभा सदस्यका उम्मेदवार बिना मगरलाई सहयोग पुग्ने देखीएको छ ।