प्रधानमन्त्रीद्वारा गण्डकी प्रदेशमा निर्वाचन तयारीको स्थलगत अनुगमन

काठमाडौँ । प्रधानमन्त्री सुशीला कार्कीले गण्डकी प्रदेशका विभिन्न जिल्लाको भ्रमण गरी निर्वाचन तयारीको अवस्था अनुगमन तथा समीक्षा गरेकी छन्। भ्रमणका क्रममा उनले मुस्ताङ जिल्ला पुगेर मुक्तिनाथ मन्दिर, जोमसोम लगायत क्षेत्रको अवलोकन गर्दै स्थानीय बासिन्दा, सुरक्षा निकायका प्रतिनिधि तथा निर्वाचनमा खटिएका कर्मचारीसँग छलफल गरेकी थिइन्।

जोमसोममा आयोजित बैठकमा प्रमुख जिल्ला अधिकारी, मुख्य निर्वाचन अधिकारी (जिल्ला न्यायाधीश) तथा सुरक्षा निकायका प्रमुखसँग निर्वाचन तयारीको अवस्था, सम्भावित चुनौती र विशेषगरी मौसमी जोखिमका विषयमा विस्तृत समीक्षा भएको थियो। हिमाली क्षेत्रमा हिमपात वा वर्षा हुँदा मतदान प्रभावित हुन सक्ने विषय उठेपछि प्रधानमन्त्रीले त्यस्ता क्षेत्रमा खटिने कर्मचारी तथा सुरक्षाकर्मीका लागि औषधि, प्राथमिक उपचार सामग्री र आवश्यक उपकरणको पर्याप्त व्यवस्था गर्न निर्देशन दिएकी हुन्।

भ्रमणका क्रममा उनले मुस्ताङका विभिन्न हिमाली बस्तीको हवाई निरीक्षणसमेत गरेकी थिइन्। स्थानीय प्रशासनका अनुसार शान्ति सुरक्षा अवस्था सामान्य रहेको छ भने सहरतर्फ गएका मतदाता पनि निर्वाचनकै कारण अपेक्षाभन्दा चाँडै घर फर्किन थालेको जानकारी दिइएको छ।