१६५ सिटका लागि साढे २ हजार भन्दा बढीको उम्मेदवारी

काठमाडौँ । आगामी फागुन २१ गते हुने प्रतिनिधि सभा सदस्य निर्वाचनमा प्रत्यक्षतर्फ उम्मेदवारको मनोनयन पत्र दर्ता प्रक्रिया उत्साहजनक र शान्तिपूर्ण रूपमा सम्पन्न भएको निर्वाचन आयोगले जनाएको छ ।

निर्वाचन आयोगका अनुसार आज बिहान १० बजेदेखि साँझ ५ बजेसम्म सम्बन्धित मुख्य निर्वाचन अधिकृत तथा निर्वाचन अधिकृतको कार्यालयमा मनोनयन दर्ता कार्यक्रम सञ्चालन गरिएको थियो । तोकिएको समयभित्र उपस्थित भएका केही उम्मेदवारको दर्ता प्रक्रिया भने साँझसम्म पनि जारी रहेको आयोगले जनाएको छ ।

निर्वाचन अधिकृतका कार्यालयबाट आयोगमा प्राप्त विवरण अनुसार साँझ ५ बजेसम्म महिला ३०३ जना र पुरुष २ हजार ३ सय ५२ जना गरी जम्मा २ हजार ६ सय ५५ जनाले उम्मेदवारी दर्ता गराएका छन् । यस पटक पनि महिला उम्मेदवारको संख्या तुलनात्मक रूपमा निकै कम देखिएको निर्वाचन आयोगका सहसचिव एवं प्रवक्ता नारायणप्रसाद भट्टराईले जानकारी दिए ।