चिसोका कारण गाजा क्षेत्रमा मानवीय संकट बढ्दो

एजेन्सी । प्यालेस्टाइनको मध्यगाजा क्षेत्रस्थित देइर अल बलहमा चिसोका कारण एक शिशुको मृत्यु भएको छ । इजरायलले नाकाबन्दी गरेका कारण यहाँका जनताले मानवीय संकट व्यहोरिरहेका छन् । अस्थायी पालमा बसेका प्यालेस्टिनीहरूलाई तीव्र हावा र वर्षाले सताएको छ । धेरैजसो आश्रयस्थलहरू प्लास्टिकको पातलो टेन्टबाट बनेका छन् ।

गाजामा विभिन्न गैरसरकारी तथा मानवीय उद्धारमा कार्यरत संस्थाहरूले हस्तान्तरण गर्नका लागि ल्याएका टेन्ट र अन्य आधारभूत सामग्रीहरूमाथि इजरायलले रोक लगाएको छ । यो अन्तर्राष्ट्रिय कानुनको उल्लंघन हो । जुन गत अक्टोबरमा हमाससँग भएको युद्धविराम सहमतिका समयमा इजरायल आफैंले व्यक्त गरेको प्रतिबद्धताविपरीत पनि हो । हालैका दिनहरूमा गाजामा रातको तापक्रम ९ डिग्री सेल्सियस (४८ डिग्री फरेनहाइट) सम्म झरेको छ ।

गाजाको नागरिक रक्षा विभागले शुक्रबार एक विज्ञप्ति जारी गर्दै भनेको छ, ‘भवन निर्माण सामग्रीको प्रवेशमा लगाइएको रोक र पुनर्निर्माणमा अवरोधका कारण यहाँ ठूलो मानवीय समस्या निम्तिएको छ ।’ इजरायली सेनाले गरेको व्यापक हमलाका कारण प्यालेस्टाइनमा धेरै घरहरू बस्नयोग्य छैनन् । प्यालेस्टिनीहरू समुद्र तटमा पाल टाँग्न बाध्य रहेको अन्तर्राष्ट्रिय सञ्चारमाध्यम अलजजिरामा उल्लेख छ ।

गाजा सहरमा रहेकी अलजजिराकी हिन्द खौदरीले धेरै ठाउँमा पालहरू नष्ट भएको बताइन् । ‘यी पालहरू मर्मत गर्ने कुनै उपाय छैन, किनभने परिवारहरूसँग त्यसका लागि आवश्यक सामग्री छैन,’ उनले भनिन् । गत साता प्यालेस्टिनी गैरसरकारी संस्था नेटवर्कका निर्देशक अमजद शावाले गाजाका २२ लाख बासिन्दामध्ये लगभग १५ लाखले इजरायल र हमासबीचको युद्ध दौरान घरबार गुमाएको बताएका थिए । संयुक्त राष्ट्रसंघका अनुसार दुई वर्षभन्दा लामो समयदेखि चलिरहेको युद्धमा इजरायलले यस क्षेत्रका लगभग ८० प्रतिशत भवनहरू ध्वस्त वा क्षतिग्रस्त पारेको छ ।