गाजामा भएको इजरायली आक्रमणमा कम्तीमा पाँचजनाको मृत्यु

एजेन्सी । गाजाको नागरिक रक्षा मन्त्रालयले शुक्रबार इजरायली आक्रमणमा कम्तीमा पाँचजनाको मृत्यु भएको बताएको छ ।

इजरायल र हमासले सम्झौता उल्लंघन गरेको आरोप लगाउँदै गत महिना दोस्रो चरणमा प्रवेश गरेको अमेरिकी मध्यस्थताको युद्धविरामको बाबजुद प्यालेस्टिनी क्षेत्रमा हिंसा जारी छ ।

हमास अधिकारीहरूलगायत उद्धार बलको रूपमा काम गर्ने नागरिक सुरक्षा एजेन्सीले एएफपीलाई मध्य गाजामा शुक्रबार भएको हवाई आक्रमणमा कम्तीमा दुईजनाको मृत्यु भएको र एकजना गम्भीर घाइते भएको बताएको छ ।

मध्यरातको समयमा गाजापट्टीको दक्षिणमा भएको ड्रोन आक्रमणमा तीनजनाको मृत्यु हुनुका साथै  धेरै जना घाइते भएको एजेन्सीले जनाएको छ । अक्टोबर १० देखि लागु भएको युद्धविरामका सर्तहरूअन्तर्गत, इजरायली सेनाहरू निर्धारित स्थानहरूबाट फर्किए पनि आधाभन्दा बढी क्षेत्र नियन्त्रणमा अझै पनि नियन्त्रणमा रहेको जनाइएको छ ।

हमासद्वारा सञ्चालित गाजाको स्वास्थ्य मन्त्रालयले युद्धविराम सुरु भएपछि यस क्षेत्रमा निरन्तर आक्रमण जारी रहँदा कम्तीमा ६०१ जनाको मृत्यु भएको बताएको छ । यसैबीच इजरायली सेनाले यो अवधिमा भएका आक्रमणमा कम्तीमा चार सैनिक मारिएको बताएको छ ।

गाजामा मिडिया प्रतिबन्ध र सीमित पहुँचले स्वतन्त्र रूपमा मृतकको संख्या प्रमाणित गर्न वा स्वतन्त्र रूपमा वास्तविक समाचार सम्प्रेषण गर्नबाट रोकेको एएफपीले जनाइएको छ ।