पूर्व गृहमन्त्री लेखकको विदेश भ्रमण र उपत्यका छाड्न नपाउने व्यवस्था जाँचबुझ आयोगद्वारा फुकुवा

काठमाडौँ । भदौ २३ र २४ गते भएका घटनासम्बन्धी छानबिन गरिरहेको जाँचबुझ आयोगले पूर्व गृहमन्त्री रमेश लेखकको विदेश भ्रमण तथा काठमाडौँ उपत्यका छाड्न नपाउने व्यवस्था फुकुवा गरेको छ।

छानबिनका क्रममा आयोगले पूर्व गृहमन्त्री लेखकलाई अनुसन्धानको दायरामा राख्दै प्रारम्भिक रूपमा विदेश भ्रमणमा रोक लगाउने र काठमाडौँ उपत्यका नछाड्ने व्यवस्था गरेको थियो। तर उक्त निर्णयको उद्देश्य पूरा भइसकेको र अनुसन्धान प्रक्रियामा बाधा नपर्ने ठहर गर्दै सो व्यवस्था फुकुवा गर्ने निर्णय गरेको हो।

जाँचबुझ आयोगको सचिवालय सिंहदरवार, काठमाडौँले मिति २०८२/६/१७ मा गृह मन्त्रालयलाई पत्राचार गर्दै पूर्व निर्णयअनुसार लेखकको विदेश भ्रमण तथा उपत्यका बाहिर जान पाउने व्यवस्था फुकुवा गरिएको जानकारी गराएको छ। आयोगका अनुसार आवश्यक कानुनी प्रक्रिया पूरा भइसकेको र छानबिन कार्यलाई प्रभावित नपार्ने आधारमा निर्णय गरिएको हो।

उक्त निर्णयबारे प्रधानमन्त्री तथा मन्त्रिपरिषद्को कार्यालय, संघीय मामिला तथा सामान्य प्रशासन मन्त्रालय, परराष्ट्र मन्त्रालय, नेपाल प्रहरी प्रधान कार्यालयलगायत लेखकलाई बोधार्थ दिइएको छ ।