एकताको नाममा पार्टी खप्टिने र उप्किने पुरानो तरिका अब निकै थोत्रो भइसक्यो : विप्लव

काठमाडौं । नेकपा का महासचिव नेत्रविक्रम चन्द ‘विप्लव’ले अहिलेको कम्युनिष्ट एकता प्रक्रियालाई पुरानो र अप्रासंगिक अभ्यास भएको बताएका छन् ।

फेसबुकमार्फत धारणा सार्वजनिक गर्दै उनले भनेका छन्, “एकताको नाममा पार्टीहरू खप्टिने र उप्किने पुरानो तरिका अब निकै थोत्रो भइसक्यो, समयले यस्तो अभ्यासलाई धेरै अघि छोडिसक्यो ।”

उनले हालैको जेन–जी आन्दोलनपछि कम्युनिष्ट आन्दोलन पुनर्गठन र नयाँ केन्द्र निर्माणको अपरिहार्यता औंल्याएका छन् । विप्लवका अनुसार, अहिलेको सन्दर्भमा सतही एकताभन्दा गहिरो वैचारिक, सैद्धान्तिक र व्यवहारिक पुनर्गठन आवश्यक छ ।

विप्लवले लेखेका छन्, “कम्युनिष्टबीच मोर्चाबन्दी जरुरी छ र मित्रसँग वैचारिक बहस अनिवार्य छ । बिना विचार, आन्दोलन केवल औपचारिकता र नाटक मात्र बन्न पुग्छ ।”

उनले अहिलेको राजनीतिक परिवेशमा इमानदार कम्युनिष्टबीच नयाँ विकल्प खोज्ने समय आएको भन्दै लेखेका छन्, “यसैमा रमाउने, लफाङ्गिने, थेचारिने आफ्नै भुटभुटी मात्र हो । इमानदार दर्शकका लागि यो केवल व्यङ्ग्यजस्तो लाग्छ ।”