यस्ता छन् माओवादीको केन्द्रीय समिति बैठकका निर्णय

काठमाडौँ । विभिन्न ६ वटा निर्णय गर्दै नेकपा माओवादी केन्द्रको केन्द्रीय समितिको बैठक सकिएको छ ।

माओवादी नेता रहिश साहका अनुसार आगामी मंसिर चौथो सातासम्म विशेष महाधिवेशन गर्ने ‘प्रचण्ड’को प्रतिबद्धता छ । ‘यसबीचमा अन्य पार्टीसँग एकता भए एकता महाधिवेशन गर्ने । त्यो अवस्थामा पार्टीको नाम समेत फेरिन सक्छ,’ साहले भने ।

यी लगायतका निर्णय गर्दै बिहीबार सुरु भएको माओवादीको केन्द्रीय समितिको बैठक सकिएको हो ।

माओवादी केन्द्रीय समितिले ‘प्रचण्ड’को संयोजकत्वमा महाधिवेशन आयोजक समितिमा रूपान्तरण हुने, पदाधिकारी नै आयोजक समितिको सचिवालयमा रूपान्तरण गर्ने र महाधिवेशन आगामी मंसिरमा गर्ने, पार्टीभित्रका नेता-कार्यकर्ताको सम्पत्ति छानबिन गर्न शक्तिशाली आयोग गठन गर्ने, नेपोटिज्मको आरोप माओवादीमाथि पनि रहेकोले कार्यविधि बनाएर पारिवारिक सदस्यहरूका बारेमा निर्णय लिने, संस्कार, कार्यशैली र चालचलन सम्बन्धी नीति बनाउने, जेन जेडलाई पार्टीका सबै कमिटीमा अधिकतम सहभागी गर्ने, युवाहरूलाई प्राथमिकता दिने, आईटीका कामलाई उच्च प्राथमिकतामा राखेर काम गर्ने र अध्यक्ष ‘प्रचण्ड’को प्रस्ताव परिमार्जनसहित पारित, वरिष्ठ उपाध्यक्ष र उपमहासचिवले राखेको प्रस्तावलाई समेत समेट्ने । महाधिवेशनसम्म छलफल गर्दै जाने निर्णय गरेको छ ।