माओवादी स्थायी समिति बैठक आज, विशेष महाधिवेशन तयारी एजेण्डामाथि छलफल

काठमाडौ । जेनजी विद्रोहपछिका राजनीतिक घटनाक्रमबारे कार्यदिशा तय गर्न नेकपा (माओवादी केन्द्र)को स्थायी समिति बैठक आज बस्दैछ। बैठक बिहान ११ बजे पेरिसडाँडामा सुरु हुनेछ।

बैठकमा अध्यक्ष पुष्पकमल दाहाल ‘प्रचण्ड’ले प्रस्ताव गरेको केन्द्रीय समिति विघटन र मंसिरमा विशेष महाधिवेशन गर्ने विषय प्रमुख एजेण्डा रहनेछ। यससँगै महाधिवेशन तयारी कार्यविधि र आगामी दिनमा पार्टीले लिने राजनीतिक मार्गदर्शनबारे पनि छलफल हुने जनाइएको छ।

यसअघि बसेको पदाधिकारी बैठकमा अध्यक्ष प्रचण्डले मौजुदा केन्द्रीय समिति विघटन गरी विशेष महाधिवेशनमा जाने प्रस्ताव राखेका थिए। सो प्रस्तावलाई आधिकारिक रूप दिन भोलि बस्ने केन्द्रीय समिति बैठकका लागि एजेण्डा तय गरिने एक नेताले बताए ।