सबै बन्धन चुँडालेर वाम एकता गर्न घनश्याम भुसालको अपिल

काठमाडौँ। नेकपा एकीकृत समाजवादीका महासचिव घनश्याम भूसालले वाम पार्टीहरूसँग एकताको अपिल गरेका छन् । 

सामाजिक सञ्जाल मार्फत भूसालले एमाले र माओवादीको स्कुलिङमा हुर्केका शक्तिहरूसँग एकताको अपिल गरेका हुन्।

‘हाम्रो विचार एउटै हो, नेताहरूको स्वास्थ्यकर खरानी रेखाले मात्रै हामीलाई विभाजित गरेको छ’ उनको अपिल छ, ‘हामी एक ठाउँ उभिन्छौँ भनेर संकल्प गर्नासाथ एउटा ऐतिहासिक शक्ति जन्मिन्छ, इतिहासको यस कालखण्डमा केवल एउटा संकल्पको खाँचो छ, हामीलाई विभाजित गर्न ती सबै बन्धन चुँडाल्न तयार होऔँ ।’

जेन जेड आन्दोलनसम्म आई पुग्दाको संकटलाई उनले लोकतान्त्रिक गणतन्त्रले खोजेको जिम्मेवारी र नैतिक मूल्य नेतृत्वमा नदेखिनु कारण भएको उल्लेख गरेका छन्।

‘हाम्रा पार्टीहरूलाई बिर्ता बनाएर नेताहरूको रजाइँ चल्न दिएको नालायकीको मूल्य आज हामीले तिर्दैछौं। राम्रो पार्टी बन्यो भने आफ्नो सुविधा र पद खोसिने डर भएका मानिसहरू पार्टी नेतृत्वमा भर्ती गर्दै जाँदा पार्टी नेतृत्व बहुमत नै यथास्थितिको पक्षमा उभिने अवस्था बन्यो’ भूसालले लेखेका छन्।