काठमाडौँ । सत्तारुढ दल नेकपा एमालेका युवा सांसद सुहाङ नेम्वाङले इम्बोस्ड नम्बर प्लेट जडान अनिवार्य गर्ने सरकारको निर्णयले जनतालाई थप सास्ती, हैरानी र झन्झट मात्र बढाएको भन्दै आपत्ति जनाएका छन् ।
बुधवार प्रतिनिधिसभा बैठकमा बोल्ने उनले तत्काल इम्बोस्ड कार्यान्वयन स्थगित गरी, आवश्यक पूर्वाधार, प्रविधि र जनचेतना सुनिश्चित गरेपछि मात्र चरणबद्ध रूपमा अघि बढाउन सरकारको ध्यानाकर्षण गराए ।
नेम्वाङले भने, ‘हामीले बुझ्नैपर्ने कुरा-सवारी प्रयोग गर्ने आम जनतामाथि पहिले नै धेरै भार छ, गाडी किन्नसाथ उच्च कर, हरेक वर्ष अनिवार्य बीमा, सडक कर तिर्न लामो लाइन, लाइसेन्स बनाउन फारम, परीक्षा र लामो प्रतीक्षा । यही सबै सास्ती, हैरानी र झन्झटको बीचमा सरकारले फेरि इम्बोस्ड नम्बर प्लेट अनिवार्य गरेको छ ।’
इम्बोस्ड नम्बर प्लेटको उद्देश्य के हो ? के हामी सँग पर्याप्त प्रविधि, सेवा केन्द्र र जनशक्ति छन् ? जस्ता प्रश्न जनतामाझबाट उठेको भन्दै उनले थपे, ‘जब हजारौँ नागरिकले वर्षौँ कुर्दा पनि लाइसेन्स पाएका छैनन्, कर तिर्न दिनभर लाइन बस्नुपरेको छ । यस्तो अवस्थामा इम्बोस्ड नम्बर प्लेट किन अनिवार्य गरिँदैछ ?’
इम्बोस्डलाई अंग्रेजीमा राखिएको विषयमा पनि उनले आम जनताले हाम्रो भाषा र भावनासँग जोडेर पनि प्रश्न गरिरहेकाले त्यो गहिरो भावनालाई बेवास्ता गर्न नहुनेमा जोड दिएका छन् ।
प्रतिक्रिया दिनुहोस
सफल खबर संवाददाता
बुधबार, १८ भदौ २०८२, १४ : ५३
लेखकबाट थप