एसपीलाई गालीगलौज गर्ने जसपा नेता यादव विरुद्ध पक्राउ पुर्जी जारी

काठमाडौँ । जनता समाजवादी पार्टी (जसपा) मधेस प्रदेशका अध्यक्ष अशोकुमार यादवविरुद्ध सर्लाही जिल्ला अदालतले पक्राउ पुर्जी जारी गरेको छ । 

जिल्ला प्रहरी कार्यालय सर्लाहीका प्रहरी उपरीक्षक (एसपी) योगेन्द्रकुमार खड्कासँग गाली गलौचमा उत्रिएका यादवलाई अदालतले शुक्रवार पक्राउ पुर्जी जारी गरेको हो । 

आपराधिक उपद्रो कसुरमा यादवविरुद्ध पक्राउ पुर्जी जारी भएको सर्लाही जिल्ला अदालतका सूचना अधिकारी सिकिन्दर कापरले बताए । 

जसपा प्रदेश अध्यक्ष यादव र सर्लाही प्रहरीका प्रमुख खड्काबिच टेलिफोनमा भएको बाझाबाझ अहिले सामाजिक सञ्जालमा भाइरल बनेको छ । पूर्व मधेस प्रदेश सभा सदस्य समेत रहनुभएका यादव र एसपी खड्काबिच बिहीबार राति टेलिफोनमा गालीगलौज भएको थियो ।