ट्रम्पले तेस्रो पटक बढाए टिकटकमाथिको प्रतिबन्ध लाग्ने म्याद

एजेन्सी  । अमेरिकी राष्ट्रपति डोनाल्ड ट्रम्पले चिनियाँ शर्ट भिडियो शेयरिङ एप टिकटकको बिक्रीको समयसीमा तेस्रो पटक बढाएका छन्न् । ट्रम्पले फेरि पनि टिकटक बेच्न यसको माउ कम्पनी बाइटडान्सलाई ९० दिनको राहत समय दिएका छन् । ट्रम्पले यसै हप्ता टिकटकका चिनियाँ मालिकलाई एप बेच्ने समयसीमा बढाउने कार्यकारी आदेशमा हस्ताक्षर गर्ने ह्वाइट हाउसले मंगलबार जनाएको छ । 

यसअघि ट्रम्पले अप्रिलको सुरुमा टिकटकलाई अमेरिकामा ७५ दिन चलाउने अनुमति दिएका थिए । यो आदेशमा हस्ताक्षर गरेपछि, अमेरिकी कम्पनीलाई टिकटक बेच्ने सम्झौता स्थगित गरिएको थियो । ह्वाइट हाउसकी प्रेस सेक्रेटरी क्यारोलिन लेभिटले भनिन्, ‘राष्ट्रपति ट्रम्प टिकटक बन्द होस् भन्ने चाहँदैनन् ।’ पछिल्लो म्याद थप ९० दिनको लागि रहनेछ, जुन समयमा प्रशासनले सम्झौता सम्पन्न भएको सुनिश्चित गर्न काम गर्नेछ ताकि अमेरिकी जनताले आफ्नो डेटा सुरक्षित रहेको सुनिश्चितताका साथ टिकटक प्रयोग गर्न जारी राख्न सकून् । 

जी७ शिखर सम्मेलनमा भाग लिएर क्यानडाबाट वाशिंगटन फर्किँदै गर्दा ट्रम्पले मंगलबार बिहान एयर फोर्स वानमा पत्रकारहरूसँग कुरा गरेका थिए ।

यस समयमा, उनले सम्भवतः फेरि समयसीमा बढाउने बताएका थिए । ट्रम्पले चिनियाँ राष्ट्रपति सी जिनपिङले अन्ततः टिकटकको बिक्रीलाई अनुमोदन गर्ने कुरामा आफू विश्वस्त रहेको पनि बताए । 

टिकटकको मूल कम्पनी बाइटडान्स चीनको हो । यो एपले प्रयोगकर्ताहरूको डेटा चीन सरकारलाई दिने गरेको अमेरिकालाई डर छ । यसलाई राष्ट्रिय सुरक्षाको लागि खतरा भन्दै अमेरिकाले एउटा कानून पारित ग‍रेको थियो जसमा बाइटडान्सले टिकटकको स्वामित्व अमेरिकी कम्पनीलाई हस्तान्तरण गर्नुपर्ने वा देशमा यसको सञ्चालन बन्द गर्नुपर्नेछ ।