‘भारत-पाकिस्तान युद्धविराम गराएजस्तै इरान र इजरायलबीच पनि सम्झौता गराउँछु’ : ट्रम्प

एजेन्सी । अमेरिकाका राष्ट्रपति डोनाल्ड ट्रम्पले भारत-पाकिस्तान युद्ध अन्त्य गराएजस्तै इरान-इजरायलबीच पनि आफूले सहमति गराउने दाबी गरेका छन्। 

ट्र्म्पले सामाजिक सञ्जालमा लेखेका छन्, ‘जसरी मैले भारत र पाकिस्तानबीच सम्झौता गराएको छु, त्यसरी नै म यी दुईबीच पनि सम्झौता गराउन सक्छु।’

ट्रम्पले भारत र पाकिस्तानबीच आफूले नै पनि युद्धविराम गराएको दाबी बारम्बार गरिरहेका छन्। तर यस विषयमा पाकिस्तानले अमेरिकालाई धन्यवाद दिए पनि भारतले भने अहिलेसम्म युद्धविराममा अमेरिकी भूमिकाको कुनै चर्चा गरेको छैन। 

ट्रम्पले सर्बिया र कोसोभोसँगै इजिप्ट र इथियोपियाबीचको द्वन्द्व पनि  रोकेको उल्लेख गरेका छन्। 

उनले अगाडि लेखेका छन्, ‘मेरो पहिलो कार्यकालमा सर्बिया र कोसोभोबीच दशकौँ लामो तनाव थियो र यो युद्धमा परिणत हुन लागेको थियो। तर मैले यसलाई रोकेँ।’

यसपछि ट्रम्पले इजिप्ट र इथियोपियाबीच पनि नाइल नदीलाई असर गर्ने बाँधका विषयमा भएको विवाद पनि  उल्लेख गरेका छन्। उनले लेखेका छन्, ‘मेरो हस्तक्षेपपछि अहिले त्यहाँ शान्ति छ।’

ट्रम्पले अगाडि लेखेका छन्, "त्यस्तैगरी इजरायल र इरान बीच चाँडै शान्ति हुनेछ। धेरै बैठकहरू भइरहेका छन्, फोनमा कुराकानी भइरहेका छन्।’