सभामुखद्वारा संसदको कार्यसूचीबारे छलफलका लागि बोलाए प्रमुख सचेतक

काठमाडौ । संसद अवरोधका कारण प्रभावित भएको कार्यसूचीबारे छलफल गर्न सभामुख देवराज घिमिरेले प्रमुख दलका प्रमुख सचेतक र सचेतकहरूलाई आज बिहान ९ बजे सिंहदरबारमा छलफलका लागि बोलाएका छन् । 

सभामुखकाे सचिवालयका अनुसार, छलफलको मुख्य विषय संसदको आगामी कार्यतालिका, विशेषगरी बजेटमाथिको छलफल कसरी अघि बढाउने भन्नेमा केन्द्रित हुनेछ। जेठ १३ गतेदेखि संसद अवरुद्ध भइरहेकाले नीति तथा कार्यक्रममाथिको बहस सकिन नपाउँदै बजेटसम्बन्धी कार्यतालिका समेत प्रभावित भएको छ।

सभामुखको पहलमा हुने यो छलफलबाट संसद पुनः सञ्चालनको दिशा र सहमति खोज्ने प्रयास हुने जनाइएको छ। बजेट पारित गर्ने संवैधानिक समयसीमा नजिकिँदै गएको अवस्थामा प्रमुख दलहरूबीच सहकार्यको आवश्यकता झनै बढेको छ।