सत्ताधारी दलहरूभित्रकै किचलो र स्वार्थ समूहहरूको दबाबमा गभर्नर नियुक्ति अलपत्र : डा.बाबुराम भट्टराई

काठमाडौँ । नेपाल समाजवादी पार्टी(नयाँ शक्ति) का अध्यक्ष एवं पूर्व प्रधानमन्त्री डा.बाबुराम भट्टराईले सत्ताधारी दलहरूभित्रकै किचलो र स्वार्थ समूहहरूको दबाबमा गभर्नर नियुक्ति अलपत्र परेको बताएका छन् ।

बुधबार सामाजिक सञ्जाल फेसबुकमा स्टाटस लेख्दै उनले यस्तो बताएका हुन् ।  उनले देशको ढुकुटीको प्रमुख संवाहक र रक्षक मानिने राष्ट्र बैंकका गभर्नरको नियुक्ति वार्षिक बजेट र मौद्रिक नीति जारी गर्ने समय नजिकिँदा समेत नहुनु लज्जास्पद र निन्दनीय विषय भएको समेत बताए ।

उनले के देश साँच्चै भ्रष्ट र अयोग्यहरूको शासनमा परिणत भएको हो भन्दै प्रश्न समेत गरे । सचेत  र सुशासन पक्षधर नागरिकहरू र जिम्मेवार राजनीतिक शक्तिहरूले समयमै खबरदारी गर्नुपर्नेमा समेत उनले जोड दिए । 

सत्ता साझेदार दलहरु(नेपाली कांग्रेस र नेकपा एमाले) बिच तालमेल नमिल्दा हालसम्म पनि गभर्नर नियुक्ति हुन सकेको छैन ।