हमासले सत्ता त्याग्नुपर्ने माग गर्दै गाजामा विशाल विरोध प्रदर्शन

एजेन्सी । गाजामा हमासले सत्ता छाड्नुपर्ने माग गर्दै विरोध प्रदर्शन भएको छ। 

बीबीसीका अनुसार मंगलबार गाजामा हमासविरुद्ध उत्तरी गाजाको बेइत लाहियाको सडकमा सयौँ मानिसले प्रदर्शन गरेका हुन्।

इजरायल र हमासबीच युद्ध सुरु भएयता गाजामा भएको यति ठूलो मात्रामा विरोध प्रदर्शन भएको यो पहिलोपटक भएको बताइएको छ।

प्रदर्शनकारीहरूले हमासले अब सत्ता त्याग्नुपर्ने माग गरेका छन्।यसैबीच नकाबधारी हमासका लडाकुहरूले बल प्रयोग गरेर प्रदर्शनकारीहरूलाई तितरबितर पार्ने प्रयास गरे।

केही लडाकुको हातमा हतियार पनि थिए। उनीहरूले प्रदर्शनकारीलाई कुटपिट पनि गरे।यसैबीच हमासका आलोचक मानिने सामाजिक कार्यकर्ताहरूले सामाजिक सञ्जालमा केही भिडिओ भाइरल बनाएका छन्।

जसमा युवाहरूहरूले ‘बाहिर...बाहिर...बाहिर...हमास बाहिर...’ भन्ने नारा लगाइरहेका छन्। हमास समर्थकहरूले भने प्रदर्शनलाई सामान्य भनेका छन्। उनीहरूले प्रदर्शनमा भाग लिनेहरू 'देशद्रोही' भएको आरोप लगाएका छन्।