कास्की जिल्ला अदालतबाहिर रास्वपा समर्थकले मनाए खुसीयाली

काठमाडौँ । सूर्यदर्शन सहकारी ठगी प्रकरणमा मुछिएका रास्वपाका सभापति रवि लामिछानेलाई धरौटीमा रिहा गर्न आदेश दिएपछि उनका समर्थकहरूमा खुसीयाली छाएको छ ।

बिहीबार कास्की जिल्ला अदालतका न्यायाधीश नीतिज राईको इजलासले रविलाई ६५ लाख धरौटीमा छाड्न आदेश दिएको हो । अदालतको आदेशपछि रविका समर्थकले खुसीयालीमा अदालत अगाडि नाराबाजी गरेका छन् ।

रास्वपाका समर्थकहरू जिल्ला अदालत बाहिर उत्साहित देखिएका छन् । सर्यदर्शन सहकारीका सबै आरोपितहरूसँग धरौटी माग गरिएको छ ।

यसैबीच रास्वपाका कार्यवाहक प्रवक्ता मनिष झाले अदालतको आदेशले आफूहरूलाई आत्मविश्वास दिलाएको बताएका छन् । ‘गेमभन्दा बाहिरको रेफ्री आएर रेडकार्ड दिनुभएको थियो । उहाँले भिएआर प्रयोग गरेर होइन भन्नुभयो । किनारा लागिसकेको होइन । हामी जस्तो अभियोग थियो त्यस्तो होइन भनेर कन्फिडेन्ट भएका छौँ,’ उनले भने, ‘आफू प्रतिको आत्मविश्वास बढेको र न्यायालयप्रति विश्वास बढेको छ ।’