विश्व बैंकबाट पाकिस्तानले पाउने भयो ४० अर्ब डलर

इस्लामावाद । बहुपक्षीय कर्जादाता निकाय विश्व बैंकबाट पाकिस्तानले ४० अर्ब डलर पाउने भएको छ । पाकिस्तानको शिक्षा, स्वास्थ्य र जलवायु उत्थानशीलता जस्ता महत्त्वपूर्ण चुनौती सम्बोधन गर्न १० वर्षे रणनीति अन्तर्गत विश्व बैंकले २० अर्ब डलर बराबरको कर्जा पारित गरेको हो ।

सन् २०२५ देखि सन् २०३५ बिचको अवधिमा हुने राजनीतिक अस्थिरताबाट परियोजनामा पर्ने असरबाट जोगाउन दीर्घकालीन विकासमा केन्द्रित हुने यो कदम चालिएको हो।

बैंकले अन्तर्राष्ट्रिय विकास संगठन (आईडीए)बाट छूटमा १४ अर्ब डलर बराबरको कर्जा दिनेछ । अरू ६ अर्ब डलर भने पुनर्निर्माण र विकासका लागि अन्तर्राष्ट्रिय बैंक (आईबीआरडी)मार्फत दिनेछ । तर यी कर्जा पाकिस्तानको वित्तीय प्रदर्शन र कर्जा सूचकांकमा भर पर्ने बताइएको छ ।

अन्य दुई लगानी एजेन्सीमार्फत बैंकले पाकिस्तानमा अर्को २० अर्ब डलर निजी लगानी पनि प्रवाह गर्दैछ । योसँगै पाकिस्तानले विश्व बैंकबाट कूल ४० अर्ब डलर पाउनेछ ।