साझा फ्रेमवर्कले बीआरआई कार्यान्वयनमा सहजता हुन्छ : शंकर पोखरेल

काठमाडौँ । नेकपा एमालेका महासचिव शंकर पोखरेलले बीआरआई अन्तरगतको चिनियाँ सहयोग परिचालनका सन्दर्भमा दुई दल एमाले र नेपाली कांग्रेसबिच साझा फ्रेमवर्क तयार भएसँगै परियोजना कार्यान्वयनमा सहजता हुने बताएका छन् । 

प्रधानमन्त्री केपी शर्मा ओलीको आसन्न चीन भ्रमणमा यस सहमतिले सार्थकता पाएसँगै नेपालको विकासमा चिनियाँ सहयोग परिचालनमा तीव्रता आउने पनि महासचिव पोखरेलको भनाई छ । ‘बीआरआईका सन्दर्भमा प्रमुख दलहरूबिचको सहमतिले अन्तर्राष्ट्रिय मामिलामा साझा राष्ट्रिय दृष्टिकोण तयार गर्ने सुखद प्रक्रिया आरम्भ भएको मान्न सकिन्छ’, महासचिव पोखरेलले सामाजिक सञ्जाल फेसबुकमा लेखेका छन् । 

प्रधानमन्त्री केपी शर्मा ओलीको चीन भ्रमण तयभएसँगै बीआरआईको कार्यान्वयनका सन्दर्भमा नेपालका प्रमुख राजनीतिक दलहरू नेपाली कांग्रेस र नेकपा एमालेले साझा धारणा बनाउन तीन सदस्यीय कार्यदल बनाएका थिए । उक्त कार्यदलले तयार पारेको प्रस्तावमा बीआरआई अन्तर्गतका योजना नेपालले अनुदानमा स्वीकार गर्ने तर ऋण नलिने बताइएको छ ।  विगतमा बीआरआईका सन्दर्भमा नेपालले एमओयू हस्ताक्षर गरेपनि सो अन्तरगतका परियोजनाहरू अघि बढ्न सकेका थिएनन् ।