बागमती प्रदेशमा विपद्‍बाट ८८ जनाको मृत्यु

मकवानपुर । बागमती प्रदेशमा गत आर्थिक वर्ष (२०८०/०८१) मा विभिन्न विपद्का घटनाबाट ८८ जनाको मृत्यु भएको आन्तरिक मामिला तथा कानुन मन्त्रालयले जनाएको छ ।

मन्त्रालयका अनुसार आगलागीका घटना ४९३, वन डढेलो १२२, पहिरो ९०, वन्यजन्तु आक्रमण ४२, भारीवर्षा ३४, बाढी ३३, चट्याङ १४, हावाहुरी १३, उच्च उचाइ (लेक लाग्ने) ५, गैर प्राकृतिक विपद् ३, सर्पदंश ३, हिम पहिरो ३ र भूकम्प १ गरी ८५६ वटा विपद्का घटना भएको छ ।

ती घटनामा ४३ जना बेपत्ता भएका छन् भने १८४ जना घाइते भएका छन् । विपद्का कारण समीक्षा अवधिमा ६१९ वटा पशु चौपायाको क्षति भएको मन्त्रालयकी सूचना अधिकारी रविता कार्कीले जानकारी दिइन् ।

विपद्का घटनाका कारण प्रदेशका १८९ वटा भौतिक पूर्वाधारमा क्षति पुग्दा आर्थिक रूपमा ५१ करोड ६७ लाख रुपैयाँको क्षति भएको उनले बताइन् ।

वन्यजन्तु आक्रमणका ४२ वटा घटनामा ६ जनाको मृत्यु भएको छ भने ३८ जना घाइते भएका छन् । यस्तै, ६ वटा पशु चौपायाको क्षति र २१ लाख रुपैयाँको भौतिक पूर्वाधार क्षति भएको मन्त्रालयले जनाएको छ ।

हिमपहिरोका ३ वटा घटनामा ३ जना घाइते भएका छन् भने भूकम्पमा परेर ३५ वटा भौतिक पूर्वाधार क्षति भएको छ । आगलागीका ४९३ घटनामा २४ जनाको मृत्यु हुनका साथै ८७ जना घाइते भएका छन् । आगलागीबाट ९७ वटा भौतिक पूर्वाधार, ३९४ वटा पशु चौपाया र ४६ करोड ९५ लाख ४२ हजार ९८७ रुपैयाँको आर्थिक क्षति भएको मन्त्रालयले जनाएको छ ।

बाढीका ३३ वटा घटनामा परेर ५ जनाको मृत्यु, २ जना बेपत्ता, २ जना घाइते, ३ वटा भौतिक पूर्वाधार क्षति, ५ वटा पशु चौपायामा क्षति पुगेको छ भने ७ लाख रुपैयाँको आर्थिक क्षति भएको छ । वन डढेलोका १२२ वटा घटनामा ४ जनाको मृत्यु, ६ जना घाइते, २५ वटा भौतिक पूर्वाधार क्षति, १०७ वटा पशु चौपाया र २ करोड ३९ लाख ८९ हजार ३०० रुपैयाँको आर्थिक क्षति भएको छ ।