चिया निर्यातका अवरोध समाधान गर्न गठित कार्यदलको प्रतिवेदन सरकारलाई बुझाइयो

काठमाडौं । नेपाली चिया निर्यातमा देखिएका समस्या पहिचान गरी समाधानका उपाय सिफारिस गर्न गठित विशेष अध्ययन कार्यदलले आफ्नो प्रतिवेदन उद्योग, वाणिज्य तथा आपूर्तिमन्त्री गौरीकुमारी यादवलाई बुझाएको छ।

मन्त्रालयका सहसचिव बुद्धबहादुर गुरुङको संयोजकत्वमा गठन भएको नौ सदस्यीय कार्यदलले दुई साताको अवधिमा अध्ययन पूरा गरी प्रतिवेदन तयार पारेको हो। कार्यदललाई नेपाली चिया क्षेत्रमा देखिएका पछिल्ला चुनौती, निर्यात अवरोध र सुधारका उपायबारे अध्ययन गर्ने जिम्मेवारी दिइएको थियो।

कार्यदलले तत्काल गर्नुपर्ने सुधार, मध्यम अवधिका रणनीति तथा दीर्घकालीन नीतिगत उपायसहितका सुझाव प्रतिवेदनमा समेटेको छ। विशेषगरी भारतले लागू गरेको नयाँ गुणस्तरसम्बन्धी व्यवस्थाका कारण नेपाली चिया निर्यातमा परेको प्रभावलाई सम्बोधन गर्न विभिन्न उपाय प्रस्ताव गरिएको छ।